امریکی صدر ٹرمپ نے کہا ہے کہ ایران بات چیت کرنا چاہتا ہے اور دیکھنا ہے کہ آیا کوئی معاہدہ ہو سکتا ہے یا نہیں۔
برطانوی خبر ایجنسی سے گفتگو میں صدر ٹرمپ نے کہا کہ امریکی حکام ایران کے ساتھ مذاکرات میں اُن افراد سے بات کر رہے ہیں جو اب با اختیار ہیں۔
واضح رہے کہ امریکی صدر نے اسٹیو وٹکوف اور جیرڈ کُشنر پر مبنی دو رکنی امریکی وفد اسلام آباد بھیجنے کا فیصلہ کیا ہے۔
وائٹ ہاؤس نے تصدیق کرتے ہوئے کہا کہ امریکی نمائندے اسٹیو وٹکوف اور جیرڈ کشنر ایران سے مذاکرات کے لیے ہفتے کی صبح پاکستان روانہ ہوں گے۔
ترجمان وائٹ ہاؤس کے مطابق نائب صدر جے ڈی وینس امریکا میں موجود رہ کر صورت حال پر نظر رکھیں گے، ضرورت پڑنے پر سب کو پاکستان روانگی کے لیے اسٹینڈ بائی رکھا جائے گا۔
ترجمان کے مطابق ان مذاکرات کے لیے ایران نے خود رابطہ کیا اور بالمشافہ ملاقات کی درخواست کی، حالیہ دنوں میں ایران کی طرف سے پیش رفت دیکھی گئی ہے، جبکہ پاکستان مذاکرات کے عمل میں حیرت انگیز ثالث رہا ہے۔
امریکی وزیرِ جنگ پیٹ ہیگسیتھ کا کہنا ہے کہ ایران کے پاس اب بھی موقع ہے، مذاکرات کی میز پر ایران کو اپنا بہترین اور دانش مندی پر مبنی فیصلہ کرنا ہوگا۔
پیٹ ہیگسیتھ نے پریس کانفرنس کرتے ہوئے کہا کہ ایران کو اپنا ایٹمی ہتھیاروں کا پروگرام چھوڑنا ہوگا۔
انہوں نے کہا کہ ڈیل کے لیے ایران کے پاس یہ تاریخی موقع ہے، بال ایران کے کورٹ میں ہے۔
امریکی وزیرِ جنگ کا کہنا تھا کہ ایرانی سمندروں کی امریکی ناکا بندی ہر گزرتے دن مضبوط ہو رہی ہے۔
امریکی فوج کے جنرل ڈین کین نے کہا کہ امریکا آبنائے ہرمز کی مکمل ناکا بندی پر ہر سطح پر عمل درآمد کر رہا ہے، قبضے میں لیے گئے ایرانی بحری جہاز توسکا کا عملہ محفوظ ہے۔
Post your comments