دوحہ میں زور دار دھماکے، قطر کا میزائل حملہ ناکام بنانے کا دعویٰ

قطر کے دارالحکومت دوحہ میں آج صبح 6 بج کر 38 منٹ پر زور دار دھماکوں کی آوازیں سنی گئیں، جس کے بعد سیکیورٹی ادارے فوری طور پر متحرک ہو گئے۔

قطر کی وزارتِ داخلہ نے ایک بیان میں کہا ہے کہ سیکیورٹی خطرہ ختم کر دیا گیا ہے اور صورتِ حال اب معمول پر آ چکی ہے، تاہم شہریوں کو ہدایت کی گئی ہے کہ وہ متعلقہ حکام کی جاری کردہ ہدایات پر مکمل عمل کریں۔

قطری وزارتِ دفاع کے مطابق مسلح افواج نے ملک کو نشانہ بنانے والے میزائل حملے کو بروقت ناکام بنا دیا۔

خبر رساں ادارے کے مطابق دوحہ میں متعدد دھماکوں کی آوازیں سنائی دیں، جبکہ ایک روز قبل بھی قطری دارالحکومت میں اسی نوعیت کی آوازیں گونجی تھیں۔

قطر سمیت خلیجی ممالک حالیہ دنوں میں ڈرونز اور میزائل حملوں کی زد میں رہے ہیں، جس کے باعث خطے میں سیکیورٹی کی صورتِ حال انتہائی کشیدہ ہو چکی ہے۔

ماہرین کے مطابق خلیجی خطہ تیزی سے بڑھتی ہوئی کشیدگی کی لپیٹ میں آ رہا ہے اور آنے والے دنوں میں صورتِ حال مزید سنگین ہو سکتی ہے۔

ابوظبی میں اماراتی حکام نے اعلان کیا ہے کہ ملک کا فضائی دفاعی نظام ممکنہ میزائل خطرے سے نمٹ رہا ہے اور اس سلسلے میں ہنگامی الرٹ جاری کر دیا گیا ہے۔

حکام کی جانب سے شہریوں کو ہدایت دی گئی ہے کہ وہ فوری طور پر محفوظ مقامات پر منتقل ہوں اور جاری کردہ تمام سیکیورٹی ہدایات پر سختی سے عمل کریں۔

دوسری جانب دبئی میں بھی متعدد علاقوں میں الرٹ میسجز جاری کیے گئے ہیں، جہاں عوام کو گھروں کے اندر رہنے اور غیر ضروری نقل و حرکت سے گریز کرنے کی تاکید کی گئی ہے۔

اماراتی حکام کے مطابق صورتِ حال کی مسلسل نگرانی کی جا رہی ہے اور شہریوں کی حفاظت اولین ترجیح ہے۔

متحدہ عرب امارات پر حملوں میں ایک اور پاکستانی جاں بحق ہو گیا۔

اماراتی حکام کے مطابق ابوظبی کے علاقے بنی یاس میں میزائل کے ٹکڑے گرے، ایک ٹکڑا لگنے سے مذکورہ پاکستانی جاں بحق ہوا ہے۔

اماراتی فضائی دفاع نے اس بیلسٹک میزائل کو ناکام بنایا تھا۔

متحدہ عرب امارات میں حملوں میں ہلاک ہونے والوں کی مجموعی تعداد 7 ہو گئی ہے جبکہ حالیہ کشیدگی میں 3 پاکستانی شہری مارے جا چکے ہیں۔

ایک پاکستانی دبئی میں جبکہ 2 پاکستانی ابوظبی میں جاں بحق ہوئے ہیں۔

خلیجی خطے میں میزائل اور ڈرون حملوں کا سلسلہ جاری ہے، کئی ممالک کے فضائی دفاعی نظام متحرک ہو گئے۔

سعودی وزارتِ دفاع کے مطابق حالیہ گھنٹوں میں مشرقی علاقے میں 12 ڈرون مار گرائے گئے، جبکہ کویتی نیشنل گارڈ نے بھی 1 ڈرون مار گرانے کی تصدیق کر دی۔

عرب میڈیا کے مطابق عراق کے دارالحکومت بغداد میں ایئر پورٹ کے قریب امریکی سفارتی تنصیب پر راکٹوں اور ڈرونز سےحملہ کیا گیا، جبکہ جدیریہ کے علاقے میں ایران نواز الحشد الشعبی کے ہیڈ کوارٹر پر فضائی حملے میں 4 افراد ہلاک ہو گئے۔