کراچی میں نصف صدی کے بعد ڈبل ڈیکر بس سروس دوبارہ شروع

کراچی میں نصف صدی کے بعد ڈبل ڈیکر بس سروس دوبارہ شروع کر دی گئی ہے۔

ڈبل ڈیکر بس سروس کی افتتاحی تقریب کراچی میں منعقد ہوئی، سینئر وزیر شرجیل انعام میمن اور صوبائی وزیر سید ناصر حسین شاہ نے ربن کاٹ کر ڈبل ڈیکر بسوں کا افتتاح کیا۔

اس موقع پر حکام نے شرجیل انعام میمن کو بسوں کی خصوصیات سے متعلق بریفنگ دی۔

افتتاحی تقریب سے خطاب کرتے ہوئے شرجیل میمن کا کہنا تھا کہ ہم نے عوام سے ڈبل ڈیکر بسوں کا وعدہ کیا تھا، ایسے پروجیکٹ لا رہے ہیں جس سے زیادہ سے زیادہ لوگوں کو فائدہ ہو۔

انہوں نے کہا کہ ڈبل ڈیکر کا روٹ 22 کلو میٹر پر مشتمل ہے اور اس کا کرایہ 80 سے 120 روپے ہوگا، ڈبل ڈیکر بس سروس ابتدائی طور پر ملیر سے شارع فیصل تک چلائی جائیں گی، کوشش ہے کہ سب سڑکوں پر ڈبل ڈیکر بسیں نظر آئیں۔

صوبائی وزیر نے کہا کہ بس کے کرایوں میں سبسڈی دے رہے ہیں، روزانہ کی بنیاد پر عوام کے لیے سہولتیں بڑھا رہے ہیں، کوشش ہے کہ نئے سال میں ٹرانسپورٹ کی سہولتیں سندھ بھر میں دی جائیں۔

ان کا کہنا تھا کراچی کی سڑکوں کے لیے تمام لوگ مل کر کام کر رہے ہیں، صعنتی علاقوں کے لیے 9 ارب روپے کا بجٹ رکھا گیا ہے جبکہ شاہراہ بھٹو اسٹیٹ آف دی آرٹ کا تحفہ عوام کو دیا گیا ہے۔

وزیراعلیٰ سندھ مراد علی شاہ نے کراچی کے عوام کو ڈبل ڈیکربس سروس کے آغاز پر مبارکباد دی ہے۔

ایک بیان میں مراد علی شاہ کا کہنا تھا کہ کراچی کے عوام بہتر سفری سہولتوں کے حقدار ہیں، نئی بس سروس کراچی کے شہریوں کے سفر کو آسان بنائے گی۔

انہوں نے کہا کہ کراچی اب صرف چل نہیں رہا، آگے بڑھ رہا ہے، آج بس چلی، کل شہر بدلے گا، کراچی کو جدید شہروں کی صف میں کھڑا کریں گے۔