’سیاسی بینر‘ آویزاں کرنے پر ارجنٹینا کی پوری ٹیم کو فیفا کی کارروائی کا سامنا کرنے کا خدشہ

فیفا ورلڈ کپ 2026ء کے سیمی فائنل میں انگلینڈ کے خلاف 2-1 کی ڈرامائی فتح کے بعد ارجنٹینا کی پوری ٹیم کو تادیبی کارروائی کا سامنا کرنا پڑ سکتا ہے۔

میچ کے بعد مڈ فیلڈر جیووانی لو سیلسو اور دفاعی کھلاڑی نکولاس اوتامندی نے ’مالویناس ارجنٹینا کا حصہ ہے‘ لکھا ہوا بینر اٹھا کر جشن منایا جس پر تنازع کھڑا ہو گیا۔

بین الاقوامی میڈیا رپورٹس کے مطابق یہ بینر فاکلینڈ جزائر سے متعلق ارجنٹینا کے دعوے کی نمائندگی کرتا ہے۔

فیفا اور انٹرنیشنل فٹبال ایسوسی ایشن بورڈ کے قوانین کے مطابق میچز کے دوران سیاسی نعروں، علامات اور بینرز کی نمائش ممنوع ہے اور خلاف ورزی کی صورت میں کھلاڑیوں یا ٹیم کے خلاف کارروائی کی جا سکتی ہے۔

ارجنٹینا کی نائب صدر وکٹوریہ ویارویل نے بھی سوشل میڈیا پر اس معاملے پر ردِعمل دیتے ہوئے لکھا ہے کہ ’مالویناس ارجنٹینا کا ہے‘، اس بینر کو اسٹیڈیم میں لانے سے روکا گیا تھا لیکن یہ دعویٰ ہمارے خون میں دوڑتا ہے اور ہم اسے اپنے دل میں رکھتے ہیں۔

مالویناس تنازع کیا ہے؟

مالویناس وہ نام ہے جو ارجنٹینا فاکلینڈ جزائر کے لیے استعمال کرتا ہے۔

یہ برطانوی زیرِ انتظام علاقہ ارجنٹینا کے مشرقی ساحل سے تقریباً 480 کلو میٹر دور واقع ہے۔

دونوں ممالک کے درمیان ان جزائر کی خود مختاری کا تنازع 19 ویں صدی سے چلا آ رہا ہے۔

1982ء میں ارجنٹینا کی فوجی حکومت نے جزائر پر قبضے کے لیے حملہ کیا تھا جس کے بعد فاکلینڈ جنگ شروع ہوئی تھی۔

2 اپریل سے 14 جون تک جاری رہنے والی اس جنگ کے اختتام پر ارجنٹینا نے ہتھیار ڈال دیے تھے، جنگ میں 649 ارجنٹینی فوجی، 255 برطانوی اہلکار اور 3 شہری ہلاک ہوئے تھے۔

فیفا ورلڈ کپ 2026ء کے سیمی فائنل میں ارجنٹینا نے انگلینڈ کو 1-2 سے شکست دے کر فائنل میں جگہ بنا لی تاہم میچ کے بعد جوڈ بیلنگھم کی لیونل میسی اور ویلنٹائن بارکو سے ہونے والی تلخ جھڑپیں بھی توجہ کا مرکز بن گئیں۔

میچ کے دوران جوڈ بیلنگھم اور لیونل میسی کے درمیان ریفری کے ایک متنازع فیصلے پر مختصر بحث بھی ہوئی۔

انگلینڈ کے کھلاڑیوں کا مؤقف تھا کہ سخت فاؤلز پر ارجنٹینا کے کھلاڑیوں کو کارڈ ملنا چاہیے تھا لیکن ریفری نے ایسا نہیں کیا۔

انگلینڈ نے 55 ویں منٹ میں انتھونی گورڈن کے گول سے برتری حاصل کی مگر ارجنٹینا نے آخری لمحات میں شاندار واپسی کی۔

لیونل میسی نے پہلے اینزو فرنانڈیز کے برابری کے گول اور پھر اضافی وقت میں لاؤتارو مارٹینیز کے فاتحانہ گول میں مدد فراہم کی جس کے نتیجے میں ارجنٹینا 1-2 سے کامیاب رہا۔

میچ ختم ہونے کے بعد ویلنٹائن بارکو اور جوڈ بیلنگھم کے درمیان بھی تلخ کلامی ہوئی۔

سوشل میڈیا پر وائرل ویڈیوز میں دیکھا جا سکتا ہے کہ بیلنگھم نے بارکو کے سر پر تھپڑ مارا جس کے جواب میں بارکو نے انہیں دھکا دیا، دیگر کھلاڑیوں نے فوری مداخلت کر کے معاملہ ٹھنڈا کروا دیا۔