بٹل اور آلائی: 1877ء کا تاریخی معرکہ تحریر و تحقیق: نجیم شاہ

صدی کے آخری ربع میں مانسہرہ کی وادیٔ کونش کا بٹل محض ایک پہاڑی گاؤں نہیں تھا۔ 1907ء کے ’’گزیٹیئر آف دی ہزارہ ڈسٹرکٹ‘‘ کے مطابق بٹل کونش وادی کے بالائی حصے کے قریب ایک بڑا گاؤں تھا، جہاں بارڈر ملٹری پولیس کی چوکی بھی قائم تھی۔ یوں بٹل تک برطانوی سرکار کی عملداری اور انتظامی گرفت موجود تھی، جبکہ اس کے آگے پہاڑی راستوں کے پار آلائی جیسے قبائلی علاقے واقع تھے۔ یہی سرحدی حیثیت بٹل کو ایک حساس مقام بناتی تھی۔

اُس زمانے میں برطانوی زیرِ انتظام ہزارہ اور آزاد قبائلی علاقوں کے درمیان آج جیسی واضح سرحد نہیں تھی۔ کہیں سرکاری چوکی تھی، کہیں انتظامی حدود ختم ہوجاتی تھیں اور آگے قبائلی خودمختاری شروع ہوجاتی تھی۔ کونش، بھوگڑمنگ، نندہار اور آلائی اسی پیچیدہ سرحدی جغرافیے کا حصہ تھے۔ بٹل ایک طرح سے اس سرحدی پٹی کا اہم دروازہ تھا، جہاں سرکار کی پولیس اور انتظام موجود تھا، مگر پہاڑی راستوں کے دوسری طرف قبائلی جرگہ اور مقامی سرداری زیادہ طاقتور نظام تھا۔

بٹل اور آلائی کے درمیان کشیدگی اچانک پیدا نہیں ہوئی تھی۔ 1868ء میں بھوگڑمنگ میں جی۔ بی۔ اسکاٹ کی سربراہی میں کام کرنیوالی برطانوی سروے پارٹی پر آلائی والوں نے حملہ کیا۔ سرکار نے کارروائی کا ارادہ کیا، مگر فوجی مہم مؤخر کرکے 500 روپے جرمانہ عائد کیا، جو ادا نہ ہوا۔ 1874ء میں آلائی والوں نے برطانوی علاقے میں کوہستانیوں پر حملہ کیا، جس کے بعد بعض افراد گرفتار اور تقریباً چار ہزار مویشی ضبط کیے گئے۔ یوں 1877ء تک پرانے تنازعات موجود تھے۔

اسی ماحول میں آلائی کے بااثر سردار ارسلہ خان کا کردار نمایاں ہوا۔ سرکاری ریکارڈ کے مطابق بٹل پر حملے کے پس منظر میں ارسلہ خان اور گڑھی حبیب اللہ کے سمندر خان کی رقابت بھی اہم تھی۔ سمندر خان برطانوی علاقے میں رہتا تھا، لیکن نندہار میں اُسکی بڑی جائیدادیں تھیں۔ زمین، اثرورسوخ اور سرداری کے تنازعات نے معاملے کو پیچیدہ کردیا۔ چنانچہ بٹل پر حملہ صرف قبائلی غصے کا نتیجہ نہیں تھا؛ اس میں مقامی رقابت اور برطانوی سرحدی سیاست بھی شامل تھی۔

پھر 16 نومبر 1877ء کو تقریباً تین سو مسلح آلائی والے بٹل پر حملہ آور ہوئے۔ سرکاری ریکارڈ کے مطابق ارسلہ خان بھی حملہ آوروں کے ساتھ موجود تھا۔ بستی میں حملہ آوروں نے دو ہندو باشندوں کو قتل کیا، بارہ افراد کو اغوا کرلیا اور بٹل گاؤں کو آگ لگا دی۔ مقامی مالکان نے لوٹی جانیوالی املاک کی مالیت تقریباً 37 ہزار روپے بتائی۔ اُس زمانے میں یہ ایک بہت بڑی رقم تھی، جس سے اندازہ ہوتا ہے کہ حملہ صرف جانی نقصان تک محدود نہیں تھا۔

حملہ آور بھی مکمل طور پر بے نقصان واپس نہیں گئے۔ سرکاری ریکارڈ میں تقریباً 13 آلائی حملہ آوروں کی ہلاکت اور 12 کی گرفتاری کا ذکر ہے۔ تاہم دستیاب دستاویزات بٹل کے اندر ہونیوالی جھڑپ کی مکمل عسکری تفصیل نہیں دیتیں، اس لیے اسے باقاعدہ جنگ کے بجائے ایک بڑے مسلح ریڈ کہنا زیادہ درست ہوگا۔ بہرحال قتل، اغوا، آتش زنی اور لوٹ مار نے اس واقعے کو کونش کی تاریخ کا ایک اہم اور خونیں باب بنا دیا۔

بٹل کا واقعہ یہیں ختم نہ ہوا۔ 2 دسمبر 1877ء کو کونش کی بستی نِل بند (نیل بنڑھ) پر حملہ ہوا، جس میں دو دیہاتی قتل اور ایک زخمی ہوا۔ پھر 9 دسمبر کو جبڑ پر حملہ کیا گیا، جہاں پانچ دیہاتی زخمی ہوئے اور ایک عورت اغوا کرلی گئی۔ یوں بٹل کا حملہ ایک الگ واقعہ نہ رہا بلکہ کونش اور ملحقہ علاقوں میں مسلسل سرحدی بحران کی صورت اختیار کرگیا۔ برطانوی حکومت کیلئے اب یہ صرف امن و امان نہیں بلکہ اپنی عملداری کا مسئلہ بھی تھا۔

برطانوی حکومت نے جوابی کارروائی میں آلائی کی ناکابندی یا بلاکیڈ کردی۔ ہزارہ میں آلائی وال اور اُنکے مویشی پکڑے جانے لگے تاکہ آلائی پر دباؤ ڈالا جاسکے۔ مگر پہاڑی جغرافیہ اور آلائی کی نسبتاً خود کفیل معیشت کے باعث یہ پالیسی فوری فیصلہ کن ثابت نہ ہوئی۔ آلائی برطانوی علاقے پر زیادہ منحصر نہیں تھا، جبکہ اسی زمانے میں افغانستان کی جنگ نے بھی برطانوی فوجی وسائل کو مصروف رکھا ہوا تھا۔ چنانچہ دباؤ کے ساتھ مذاکرات کا راستہ بھی اختیار کیا گیا۔

اس کشمکش کا اہم باب 1880ء میں سامنے آیا، جب آلائی کے جرگے نے بٹل حملے میں اغوا کیے گئے ہندو قیدیوں میں سے متعدد افراد واپس کردیئے۔ 1881ء میں آلائی والوں نے برطانوی قید میں موجود بعض افراد کی رہائی کیلئے 500 روپے ادا کیے۔ تاہم سرکار نے بٹل ریڈ کیلئے 5 ہزار روپے جرمانہ، 1868ء کے سروے واقعے کا 500 روپے جرمانہ اور ارسلہ خان سے ذاتی طور پر سرکار کی اطاعت قبول کرنے کی شرط بھی رکھی۔ یہ شرائط پوری نہ ہوسکیں اور تنازع مکمل طور پر ختم نہ ہوا۔

بٹل اور آلائی کی 1877ء کی داستان دراصل اس سرحدی دُنیا کی تصویر ہے جہاں ایک طرف برطانوی سرکار کی چوکی، پولیس اور قانون تھا اور دوسری طرف قبائلی خودمختاری، جرگہ اور سرداری کا نظام۔ بٹل اسی سرحد پر کھڑا ایک اہم قصبہ تھا، جس نے دونوں دنیاؤں کے درمیان کشمکش کا بوجھ اُٹھایا۔ 16 نومبر 1877ء کا حملہ اسی تناؤ کا خونیں اظہار تھا۔ آج بٹل آباد ہے، مگر اس کی مٹی میں 1877ء کی وہ تاریخ بھی محفوظ ہے جو وقت کے ساتھ دھندلا گئی۔