یوکرینی دارالحکومت کیف سمیت دیگر بڑے شہروں پر روسی حملوں میں 10 افراد ہلاک اور تقریباً 100زخمی ہو گئے۔
غیر ملکی میڈیا کے مطابق یوکرینی حکام کا کہنا ہے کہ یوکرین کے چوتھے بڑے شہر دنیپرو پر روسی میزائل اور ڈرون حملوں میں 5 افراد ہلاک جبکہ 25 زخمی ہوئے۔
حکام کا مزید کہنا ہے کہ کیف پر حملوں میں کم از کم 4 افراد ہلاک اور 51 زخمی ہوئے۔
دارالحکومت کیف کے میئر کا کہنا ہے کہ روسی میزائل حملے میں ایک 24 منزلہ عمارت کا حصہ گر گیا جس کے ملبے تلے متعدد افراد کے دبے ہونے کا خدشہ ہے۔
میئر کا مزید کہنا ہے کہ عمارت کے ملبے میں پھنسے افراد کی تلاش کے لیے سرچ آپریشن کا آغاز کر دیا گیا ہے۔
میئر کیف کا یہ بھی کہنا ہے کہ میزائلوں کے ٹکڑے گرنے سے ایک 9 منزلہ عمارت سمیت متعدد عمارتوں میں آگ بھی لگ گئی ہے۔
دوسری جانب یوکرین کے دارالحکومت کیف میں مزید دھماکے سنے گئے ہیں۔
یوکرین کے دارالحکومت کیف میں 8 دھماکوں کی زور دار آوازیں سنی گئی ہیں جس سے 4 افراد کے ہلاک اور کئی دیگر کے زخمی ہونے کی بھی اطلاعات ہیں۔
غیرملکی میڈیا کے مطابق دھماکوں کے بعد شہر کے مختلف علاقوں میں بلیک آوٹ ہوگیا۔
روسی میڈیا کے مطابق کیف میں گیس اسٹیشن کو بھی آگ لگ گئی، دھماکے خارکیف سمیت دیگر تین مقامات میں بھی ہوئے ہیں۔
روسی میڈیا کے مطابق یوکرینی حملوں کے جواب میں روس یوکرین میں فوجی اہداف کو نشانہ بنارہا ہے۔
Post your comments