آبنائے ہرمز کھلوانے کے لیے امریکا نیا عالمی اتحاد بنانے کے لیے سرگرم ہوگیا۔
امریکی محکمہ خارجہ نے دنیا بھر میں امریکی سفارت خانوں کو تار روانہ کیا ہے۔
امریکی میڈیا کے مطابق تار میں کہا گیا ہے کہ متعلقہ ممالک کو ایک نئے معاہدے کیلیے راغب کریں۔
اس نئے معاہدے کا نام میری ٹائم فریڈم کنسٹرکٹ رکھا گیا ہے۔
امریکی صدر ٹرمپ چند ہفتے قبل دعویٰ کر چکے ہیں کہ ہرمز مکمل طور پر کھلی اور کاروبار کے لیے تیار ہے۔
امریکا کا ایران کے خلاف پہلی بار ہائپرسونک میزائل تعینات کرنے پر غور، بلوم برگ کی رپورٹ کے مطابق امریکی سینٹ کام نے ڈارک ایگل میزائل مشرقِ وسطیٰ بھیجنے کی درخواست کی ہے۔
تاہم اب تک اس درخواست سے متعلق کوئی حتمی فیصلہ نہیں ہوا۔ اقدام کا مقصد ایران کے اندر گہرائی میں موجود میزائل لانچرز کو نشانہ بنانا ہے۔
امریکی سینٹرل کمانڈ نے رپورٹ پر تبصرے سے گریز کیا ہے۔
ڈارک ایگل میزائل کی ممکنہ رینج 1 ہزار 725 میل سے زائد ہے جو آواز کی رفتار سے پانچ گنا زیادہ تیز پر واز کر سکتا ہے۔
امریکی بحری بیڑا جیرلڈ فورڈ بھی جلد مشرق وسطیٰ سے نکل جائے گا، یہ بحری بیڑا دس ماہ سے مشرق وسطیٰ میں تعینات تھا۔
امریکی اخبار واشنگٹن پوسٹ کے مطابق یہ بحری بیڑا مرمّت کے لیے مشرق وسطیٰ سے باہر لے جایا جا رہا ہے۔
اس بحری بیڑے کی مشرق وسطیٰ سے رخصت کے بعد ایران کے خلاف جنگ کے لیے امریکا کی فائر پاور کم ہو گئی ہے۔
اس سے پہلے ایران نے دعویٰ کیا تھا کہ اس نے امریکی بحری بیڑے یو ایس ایس ابراہام لنکن پر حملہ کیا ہے۔
امریکا نے اس کی تردید کی تھی تاہم ابراہام لنکن عالمی راڈار سے غائب ہے، بعض اطلاعات کے مطابق امریکی بحری بیڑا یو ایس ایس ابراہام لنکن اپنے راڈار بند کر کے خلیج اومان کے قریب موجود ہے۔
Post your comments