امریکا نے ایران سے مطالبہ کیا ہے کہ آبنائے ہرمز میں حملے بند کرنے اور ٹول ٹیکس وصول نہ کرنے کا اعلان عوامی سطح پر کیا جائے۔
امریکی حکام نے دھمکی بھی دی کہ ایران نے ایسا نہ کیا تو نتائج اچھے نہیں ہوں گے۔
غیر ملکی خبر ایجنسی کے مطابق امریکی حکام نے کہا کہ حالیہ دنوں میں دونوں ممالک کے درمیان بات چیت نتیجہ خیز رہی ہے۔
امریکی عہدیدار نے یہ دعویٰ کیا کہ ایران نے امریکا کو بتایا ہے کہ جہازوں پر حالیہ حملے ایرانی نظام کے سخت گیر حصے کے باعث ہوئے۔
غیر ملکی خبر ایجنسی کے مطابق ایران کے جوہری تنصیبات تک رسائی نہ دینے پر امریکا کے پاس عسکری آپشنز موجود ہیں، مطلوبہ جوہری نتائج حاصل نہ ہوئے تو ایران کے ساتھ کوئی معاہدہ نہیں ہوگا۔
امریکی صدر ڈونلڈ ٹرمپ نے دعویٰ کیا ہے کہ ایران نے امریکا سے مذاکرات کا سلسلہ جاری رکھنے کی درخواست کی ہے، جس پر واشنگٹن نے آمادگی ظاہر کر دی ہے۔
اپنے سوشل میڈیا پلیٹ فارم پر جاری بیان میں ڈونلڈ ٹرمپ نے کہا کہ ایران نے بات چیت جاری رکھنے کی خواہش کا اظہار کیا، تاہم امریکا نے ایرانی حکام کو دو ٹوک انداز میں آگاہ کر دیا ہے کہ جنگ بندی اب ختم ہو چکی ہے۔
ڈونلڈ ٹرمپ نے اپنے پیغام میں کہا کہ امریکا نے ایران کو واضح الفاظ میں بتا دیا ہے کہ جنگ بندی ختم ہو گئی ہے۔
Post your comments