ایرانی پارلیمنٹ کے اسپیکر محمد باقر قالیباف نے امریکا کو خبردار کرتے ہوئے کہا ہے کہ امریکا نے اب تک یہ نہیں سیکھا کہ دھونس اور وعدہ خلافی کی قیمت چکانا پڑتی ہے۔
جاری کیے گئے بیان میں انہوں نے کہا ہے کہ اگر حملہ کرو گے تو جواب بھی ملے گا، بے مقصد ہاتھ پاؤں مارنے کے بجائے باز آؤ، ورنہ مزید گہرائی میں ڈوب جاؤ گے۔
محمد باقر قالیباف کا کہنا ہے کہ آبنائے ہرمز صرف ایران کے انتظامات کے تحت کھلے گی، امریکی دھمکیوں سے نہیں۔
دوسری جانب ایرانی وزارت خارجہ کے ترجمان اسماعیل بقائی نے کہا ہے کہ نیٹو کے سیکریٹری جنرل مارک روٹے کے بیانات یورپی ممالک کی امریکا اور اسرائیل کی ایران کے خلاف جنگ میں دانستہ شمولیت کا اعتراف ہیں۔
ایک بیان میں اسماعیل بقائی نے کہا ہے کہ جن ممالک نے اپنی سر زمین، فوجی اڈے اور تنصیبات استعمال کرنے کی اجازت دی، وہ اس بلااشتعال جارحیت اور اس کے نتائج کی ذمے داری سے نہیں بچ سکتے۔
ایرانی وزیرِ خارجہ عباس عراقچی نے کہا ہے کہ ہم بدزبانی کا جواب بدزبانی سے نہیں بلکہ عملی اقدام سے دیتے ہیں۔
انہوں نے امریکی صدر کے بیان پر ردِعمل دیتے ہوئے سماجی رابطے کی ویب سائٹ ایکس پر پیغام جاری کیا ہے۔
عباسی عراقچی نے کہا ہے کہ مہذب اور بہادر ایرانی قوم کو توہین آمیز زبان میں مخاطب کرنے سے اس کی عظمت کم نہیں ہوتی۔
ایرانی وزیرِ خارجہ نے لکھا ہے کہ ایرانی اپنی شائستگی، ثقافت اور اعلیٰ اخلاقی اقدار کے باعث دنیا بھر میں پہچانے جاتے ہیں۔
انہوں نے یہ بھی لکھا ہے کہ ہم بد زبانی کا جواب بد زبانی سے نہیں دیتے، بلکہ بے خوفی اور غیر معمولی جرأت کے ساتھ عملی اقدام سے دیتے ہیں۔
اس سے قبل امریکی صدر ڈونلڈ ٹرمپ نے گزشتہ روز کہا تھا کہ واشنگٹن غالباً بدھ کی شب ایران پر ایک بار پھر حملہ کرے گا۔
ٹرمپ کے مذکورہ بیان سے قبل ازیں بھی امریکا آبنائے ہرمز میں بحری جہازوں پر حملوں کو جواز بنا کر ایران پر حملہ کر چکا تھا۔
ٹرمپ نے بدھ کو نیٹو سربراہی اجلاس کے موقع پر ترک دارالحکومت انقرہ میں صحافیوں سے گفتگو کرتے ہوئے کہا تھا کہ ہم نے گزشتہ رات انہیں بہت سخت نشانہ بنایا، بہت ہی سخت، غالب امکان ہے کہ آج رات بھی انہیں سخت نشانہ بنایا جائے گا۔
انہوں نے یہ بھی کہا تھا کہ میں اب ان سے مزید ڈیل نہیں کرنا چاہتا، وہ اچھے لوگ نہیں ہیں۔
تازہ امریکی حملوں کے جواب میں ایران نے کویت اور بحرین میں امریکی فوجی اڈوں پر میزائل اور ڈرون حملے کر دیے۔
ایرانی سرکاری ٹی وی کے مطابق کیمپ عریفجان، علی السالم (کویت) اور جفیر، شیخ عیسیٰ (بحرین) کے اڈوں کو نشانہ بنایا گیا۔
ایران کی پاسدارانِ انقلاب نے جاری بیان میں خبردار کیا ہے کہ اگر امریکی حملے دوبارہ ہوئے تو خطے میں دیگر امریکی اڈوں پر بھی کارروائیاں کی جائیں گی۔
ایرانی پاسداران انقلاب کے مطابق امریکی حملوں میں مشہد جانے والے 2 پل بھی نشانہ بنائے گئے، جنہیں ایران نے شہید آیت اللّٰہ علی خامنہ ای کے جلوسِ جنازہ کو متاثر کرنے کی کوشش قرار دیا۔
Post your comments