Nawaipakistan.com

وفاقی وزیر پارلیمانی امور طارق فضل چوہدری نے کہا ہے کہ آزاد کشمیر کے انتخابات کو ملتوی کیا جانا غیر آئینی ہوگا۔

جیو نیوز سے گفتگو میں طارق فضل چوہدری نے کہا کہ پیپلزپارٹی نے آزاد کشمیر انتخابات ملتوی کرنے سے متعلق ن لیگ سے مشاورت نہیں کی۔

انہوں نے کہا کہ آزاد کشمیرمیں انتخابات کا شیڈول جاری ہوچکا، 27 جولائی پولنگ ڈےہے، انتخابات کا شیڈول کسی کی خواہش پر جاری نہیں ہوا۔

وفاقی وزیر نے مزید کہا کہ آزاد کشمیر کے آئین کے مطابق یہ انتخابات ہو رہے ہیں، 4 اگست ہمارے پاس آخری تاریخ ہے، جس سے پہلے انتخابات ہونے ہیں۔

اُن کا کہنا تھا کہ اسمبلی کی مدت ختم ہونے سے 45 دن قبل یہ شیڈول دیا جاتا ہے، موجودہ اسمبلی نے 3 اگست کو حلف اٹھایا تھا، 4 اگست سے قبل ہر صورت انتخابات ہونے ہیں۔

طارق فضل چوہدری نے کہا کہ اگر آزاد کشمیر کے انتخابات کو ملتوی کیا جاتا ہے تو وہ غیر آئینی ہوگا، الیکشن ہی تمام مسائل کا حل ہیں۔

انہوں نے کہا کہ کاغذات نامزدگی جمع کرانے کی تاریخ کو آگے کیا جاسکتا ہے، مسلم لیگ ن چاہتی ہے آزاد کشمیر میں الیکشن برقت ہوں تاخیر نہ ہو۔

وفاقی وزیر نے یہ بھی کہا کہ میرپور ڈویژن مظفرآباد ڈویژن میں حالات نارمل ہیں، صرف راولاکوٹ میں کشیدگی پائی جاتی ہے، جن قیمتی انسانی جانوں کا نقصان ہوا ہے وہ باعث افسوس ہے۔

اُن کا کہنا تھا کہ کالعدم جوائنٹ ایکشن کمیٹی جو 12 سیٹوں کا نعرہ لگا رہی ہے وہ سیاسی بات ہے، کمیٹی کو حکومت آزاد کشمیر نے کالعدم قرار دیا ہے، وہ دھرنا ختم کریں۔

طارق فضل چوہدری نے کہا کہ دھرنے ختم ہوں تو ہم دیکھتے ہیں صورتحال کو کیسے معمول پر لاسکتے ہیں، کالعدم ایکشن کمیٹی کے لوگوں سے پوچھوں گا کل آپ ان کی ماؤں کو کیا جواب دیں گے، کیا آپ نے 12 مہاجرین کی سیٹوں کے خاتمے کےلیے ان لوگوں کو آگ میں ڈالا۔

آزاد کشمیر کے صدر چوہدری لطیف اکبر نے کہا ہے کہ موجودہ صورتحال ایکشن کمیٹی کی پیدا کردہ ہے۔

ایک بیان میں چوہدری لطیف اکبر نے کہا کہ سیاسی جماعتوں اور حکومت کی کوشش ہےکہ معاملے کو ڈائیلاگ سے حل کیا جائے۔

انہوں نے کہا کہ وزیراعظم آزاد کشمیر نے ایکشن کمیٹی کے شوکت نواز کے گھر جاکر ان سے بیٹھ کر معاملات حل کرنے کی بات کی لیکن وہ نہیں مانے۔

صدر آزاد کشمیر نے مزید کہا کہ موجودہ صورت حال ایکشن کمیٹی کی پیدا کردہ ہے، حکومت بات کرنے کےلیے تیار ہے، تمام اسٹیک ہولڈر مل بیٹھ کر مسئلے کو حل کرنے کی کوشش کریں۔

اُن کا کہنا تھا کہ منگل کو اسمبلی اجلاس میں وزیراعظم اور دیگر ارکان پالیسی بیان دیں گے۔

دوسری جانب آزاد کشمیر کے سابق وزیراعظم سردار عتیق احمد خان نے کہا ہے کہ آزاد کشمیر کی موجودہ صورت حال تکلیف دہ اور تشویش کا باعث ہے، اسے سنجیدگی سے سلجھانے کی ضرورت ہے، آزاد کشمیر میں انتخابی عمل رکنا نہیں چاہیے، بروقت انعقاد ہونا چاہیے۔