سیکیورٹی ذرائع کا کہنا ہے کہ جاری آپریشن غضب للحق کے دوران پاک افواج نے افغانستان میں کامیاب فضائی حملے کیے۔ پاک افواج نے 16 مارچ کی شب کابل، ننگر ہار میں افغان طالبان فوجی تنصیبات کو کامیابی سے نشانہ بنایا۔
سیکیورٹی ذرائع کے مطابق پاک افواج نے کابل میں دو مقامات پر ٹیکنیکل سپورٹ انفرااسٹرکچر اور ایمونیشن اسٹوریج کو تباہ کیا۔
وڈیو میں فضائی حملے کے بعد دھماکوں کی وجہ سے بلند ہوتے شعلے دیکھے جاسکتے ہیں، بلند ہوتے شعلے اس بات کی تصدیق کرتے ہیں کہ یہ بارود کا بہت بڑا ذخیرہ تھا۔
سیکیورٹی ذرائع کا کہنا ہے کہ افغان طالبان کے ترجمان ذبیع اللّٰہ مجاہد کا ڈرگ اسپتال کو نشانہ بنانے کا بیان مضحکہ خیز ہے۔ ننگر ہار میں پاک افواج نے 4 مقامات پر افغان طالبان کی ملٹری تنصیبات کو نشانہ بنایا۔
ذرائع کے مطابق ننگر ہار میں ملٹری تنصیبات سے ملحقہ لاجسٹک انفرااسٹرکچر کو تباہ کیا گیا، ننگر ہار میں فضائی کارروائیوں میں ایمونیشن، ٹیکنیکل انفرااسٹرکچر کو بھی تباہ کیا گیا۔
سیکیورٹی ذرائع کا کہنا ہے کہ آپریشن غضب للحق کے تحت کارروائیاں اہداف کے حصول تک جاری رہیں گی۔
وفاقی وزارت اطلاعات نے کہا ہے کہ پاکستان کی افغانستان میں کارروائیاں نہایت درست اور محتاط ہوتی ہیں تاکہ کولیٹرل نقصان نہ ہو۔
وزارت اطلاعات کی جانب سے جاری بیان میں کہا گیا ہے کہ طالبان رجیم کے نام نہاد ترجمان کا دعویٰ حقائق کے برعکس ہے، طالبان رجیم کے دعوے کا مقصد عوامی رائے کو گمراہ کرنا ہے۔
بیان میں مزید کہا گیا کہ 16 مارچ کی رات پاکستان نے کابل، ننگرہار میں دہشتگردی کے معاون ڈھانچے کو نشانہ بنایا، انفرااسٹریکچر میں تکنیکی آلات کے ذخیرے اور اسلحہ و گولہ بارود کے ذخائر شامل تھے۔
وزارت اطلاعات کے مطابق یہ اسلحہ بے گناہ پاکستانی شہریوں کے خلاف استعمال ہو رہا تھا، ذخیرہ شدہ گولہ بارود کے دھماکے دہشت گرد پراکسی کے زیرِ استعمال اسلحے کی موجودگی ظاہر کرتے ہیں۔
وزارت اطلاعات نے کہا کہ ان اہداف کو منشیات بحالی مرکز قرار دینا جذبات کو بھڑکانے کی کوشش ہے۔ افغان طالبان رجیم کا دعویٰ سرحد پار دہشت گردی کی معاونت کو چھپانے کا حربہ ہے۔
وزارت اطلاعات کے مطابق افغان طالبان رجیم کے ترجمان کا بیان جھوٹا اور گمراہ کن ہونے کی بنا پر مسترد کرتے ہیں، پاکستان نے نہایت درستی کے ساتھ کابل اور ننگرہار میں افغان طالبان کی عسکری تنصیبات کو نشانہ بنایا۔
Post your comments