کراچی خودکش دھماکا، پانچوں غیر ملکی محفوظ رہے، 2 دہشتگرد ہلاک

کراچی کے علاقے لانڈھی مانسہرہ کالونی میں وین کے قریب ہونے والے خود کش دھماکے سے متعلق پولیس کا کہنا ہے کہ گاڑی میں موجود پانچوں غیر ملکی محفوظ رہے جبکہ پولیس نے فائرنگ کر کے دونوں دہشتگردوں کو ہلاک کردیا۔پولیس کے مطابق وین میں موجود ڈرائیور اور گارڈ جاں بحق ہوئے ہیں جبکہ تمام غیر ملکیوں کو محفوظ مقام پر منتقل کر دیا گیا ہے۔پولیس کا کہنا ہے کہ ایک خودکش حملہ آور نے خود کو دھماکے سے اڑا لیا جبکہ اس کے دوسرے ساتھی کو پولیس نے فائرنگ کر کے ہلاک کر دیا۔

مارا گیا دوسرا دہشتگرد بھی خودکش بمبار تھا

پولیس حکام کا کہنا ہے کہ ابتدائی اطلاعات کے مطابق مقابلے میں مارا گیا دوسرا دہشت گرد بھی خود کش بم بار تھا، مذکورہ دہشت گرد کے جسم سے خود کش جیکٹ اور گرینیڈ بندھا ہوا ملا ہے۔پولیس نے واقعے کے بعد علاقے کو گھیرے میں لے لیا ہے، بم ڈسپوزل ٹیم موقع پر پہنچ گئی ہے۔پولیس حکام کے مطابق غیر ملکی ایکسپورٹ پروسسنگ زون میں کام کرتے ہیں، وین کو موٹر سائیکل پر سوار خود کش بم بار کے ذریعے نشانہ بنایا گیا، جائے وقوع سے کلاشنکوف اور دستی بم سے بھرا بیگ بھی ملا ہے۔

خودکش حملے میں 3 افراد زخمی ہوئے

ایمرجنسی انچارج جناح اسپتال ڈاکٹر نوشین نے میڈیا کو بتایا ہے کہ دھماکے کے 3 زخمی ایمرجنسی میں لائے گئے۔

زخمیوں میں کوئی غیر ملکی شامل نہیں

انہوں نے بتایا کہ دھماکے کے زخمیوں میں کوئی غیر ملکی شامل نہیں ہے، زخمیوں میں 2 سیکیورٹی گارڈ اور ایک راہ گیر شامل ہے۔

1 زخمی کی حالت تشویشناک

ایمرجنسی انچارج جناح اسپتال ڈاکٹر نوشین کا کہنا ہے کہ 1 زخمی 43 سالہ نور محمد کی کی حالت تشویش ناک ہے، زخمیوں کو ابتدائی طبی امداد کے بعد نیورو سرجری وارڈ میں منتقل کیا جائے گا۔جناح اسپتال حکام کے مطابق زخمیوں میں نور محمد، لنگر خان، سلمان رفیق شامل ہیں۔

زخمی فائر فائٹر سلمان کو کئی گولیاں لگیں

لانڈھی واقعے میں زخمی سلمان کے بھائی شہزاد صادق نے جناح اسپتال میں ’جیو نیوز‘ سے گفتگو میں بتایا کہ لانڈھی دھماکے اور فائرنگ میں میرا بھائی سلمان زخمی ہوا ہے، جو فائر فائٹر ہے اور پورٹ قاسم ڈیوٹی کے لیے جارہا تھا۔شہزاد صادق نے بتایا کہ بھائی سلمان کو جسم کے مختلف حصوں پر گولیاں لگی ہیں، سلمان نے زخمی ہونے کے بعد اہلیہ کوکال کر کے اطلاع دی تھی۔

گاڑی اور موٹر سائیکل کو نقصان

پولیس کے مطابق دھماکے میں قریب موجود ایک گاڑی اور موٹر سائیکل کو بھی نقصان پہنچا ہے۔واقعے کے عینی شاہد سیکیورٹی گارڈ نے ’جیو نیوز‘ کو بتایا کہ ہم 2 گاڑیوں میں ڈیفنس کے علاقے زمزمہ سے نکلے تھے، مانسہرہ کالونی کے قریب زور دار دھماکا ہوا، دھماکے کے بعد ایک دہشت گرد گاڑی پر فائرنگ کر رہا تھا۔

1 دہشتگرد نے خود کو دھماکے سے اڑایا، دوسرے نے فائرنگ کی: DIG

ڈی آئی جی ایسٹ اظفر مہیسر کا کہنا ہے لانڈھی کی مانسہرہ کالونی میں 1 دہشت گرد نےگاڑی کےقریب آ کر خود کو دھماکے سے اڑایا، دوسرے دہشت گرد نے گاڑی پر فائرنگ کی۔میڈیا سے گفتگو کے دوران انہوں نے بتایا کہ غیر ملکیوں کے ہمراہ موجود سیکیورٹی گارڈ نے دہشت گرد سے مقابلہ کیا، قریب ہی پیٹرول پمپ پر پولیس موبائل کھڑی تھی جو دھماکے کی آوازسن کر جائے وقوع پر پہنچی۔

شرافی گوٹھ تھانے کے اہلکاروں نے بھی مقابلہ کیا

ڈی آئی جی ایسٹ اظفر مہیسر نے بتایا ہے کہ شرافی گوٹھ تھانے کے اہلکاروں نے بھی دہشت گرد سے مقابلہ کیا۔

خودکش حملہ آور کا سر اور اعضاء مل گئے

ان کا کہنا ہے کہ حملہ صبح 6 بج کر50 منٹ پر کیا گیا، خودکش حملہ آور کا سر اور کچھ اعضاء ملے ہیں، ہلاک دوسرے دہشت گرد کے فنگر پرنٹس کے ذریعے شناخت کی کوشش کی جائے گی۔

غیر ملکیوں سے متعلق تھریٹس تھیں

ڈی آئی جی ایسٹ اظفر مہیسر کے مطابق غیر ملکیوں سے متعلق تھریٹس موجود تھیں، ان سیکیورٹی تھریٹس کے باعث پولیس بھی الرٹ تھی، سیکیورٹی سے متعلق سی پیک اور نان سی پیک کا پلان تیار کیا گیا تھا۔

حملہ آور پیدل تھے

انہوں نے بتایا کہ ابتدائی تفتیش کے مطابق حملہ آور پیدل تھے، حملہ آوروں کے پاس 6 دستی بم، ایس ایم جی،اس کے 3 میگزین اور پیٹرول کی 2 بوتلیں بھی تھیں، تمام چیزیں حملہ آوروں کے پاس موجود بیگ میں تھیں۔ڈی آئی جی ایسٹ اظفر مہیسر کا کہنا ہے کہ ملازمین کی جس وین کو نشانہ بنایا گیا اس کے پیچھے کمپنی کے افسر کی گاڑی تھی، افسر کی گاڑی کے پیچھے کمپنی کے سیکیورٹی گارڈز کی گاڑی تھی، حملہ آور دہشت گردوں نے وین پر فائرنگ کی۔

دہشتگرد کو سر پر گولی مار کر ہلاک کیا

انہوں نے بتایا کہ وین کے پیچھے موجود سیکیورٹی گارڈز نے جوابی فائرنگ کی، سیکیورٹی گارڈز کی فائرنگ سے 1 دہشت گرد مارا گیا۔ڈی آئی جی ایسٹ اظفر مہیسر نے یہ بھی بتایا ہے کہ دہشت گرد کو سر پر گولی مار کر ہلاک کیا گیا، دوسرے دہشت گرد نے وین کے قریب آ کر خود کو دھماکے سے اڑایا۔کراچی کے علاقے لانڈھی میں ہوئے خود کش دھماکے کے حوالے سے بم ڈسپوزل اسکواڈ کی رپورٹ سامنے آ گئی۔بم ڈسپوزل اسکواڈ کی رپورٹ کے مطابق دھماکے کی جگہ سے حملہ آور کے جسم کے مختلف اعضاء ملے ہیں، دوسرا حملہ آور موقع پر ہلاک ہو گیا۔رپورٹ میں کہا گیا ہے کہ ہلاک دہشت گرد سے بیگ برآمد ہوا ہے، جس سے 4 دستی بم، رائفل، گرینیڈ، 3 میگزین ملے ہیں۔بم ڈسپوزل اسکواڈ کی رپورٹ میں بتایا گیا ہے کہ دہشت گرد کے بیگ سے پانی کی بوتل اور پیٹرول کی بوتل بھی ملی ہے۔رپورٹ میں بتایا گیا ہے کہ ہلاک دہشت گرد کی جیب اور ہاتھ سے بھی 2 دستی بم ملے ہیں۔بم ڈسپوزل اسکواڈ کی رپورٹ کے مطابق دھماکے کی جگہ سے تمام شواہد اکٹھے کر لیے گئے ہیں۔رپورٹ میں یہ بھی بتایا گیا ہے کہ برآمد کیا گیا باردودی مواد اور اسلحہ جدید نوعیت کا ہے۔واضح رہے کہ آج صبح سویرے کراچی کے علاقے لانڈھی کی مانسہرہ کالونی میں غیر ملکیوں کی وین کے قریب خود کش دھماکا ہوا ہے، جس میں 2 دہشت گرد ہلاک جبکہ 2 افراد جاں بحق اور 3 زخمی ہوئے تھے۔پولیس کے مطابق وین میں موجود ڈرائیور اور گارڈ جاں بحق ہوئے، گاڑی میں موجود پانچوں غیر ملکی محفوظ رہے جنہیں محفوظ مقام پر منتقل کر دیا گیا ہے۔بعد میں دھماکے کا 1 زخمی سیکیورٹی گارڈ اسپتال میں دم توڑ گیا جبکہ دوسرے زخمی شخص کو وینٹی لیٹر پر منتقل کر دیا گیا ہے۔