فرانس کے دارالحکومت پیرس میں انٹرنیشنل کشمیر پیس فورم فرانس کے زیر اہتمام برہان مظفر وانی کے یوم شہادت کی تقریب کا انعقاد کیا گیا جس کی صدارت چیرمین انٹرنیشنل کشمیر پیس فورم فرانس زاہد اقبال ہاشمی نے کی۔اس تقریب میں الطاف حسین وانی چیئرمین کشمیر انسٹیٹیوٹ آف انٹرنیشنل ریلیشنز نے بطور مہمان خصوصی شرکت کی۔الطاف حسین وانی نے شہید وانی کی شہادت کے سلسلے میں منعقد کیے گئے سیمنار سے خطاب کرتے ہوئے کہا کہ ہم طویل عرصے سے جدوجہد کرتے چلے آرہے ہیں۔اُنہوں نے کہا کہ بھارت کی حکومت اپنی افواج کے ذریعے کشمیریوں کے حق خود ارادیت کو دبانے کےلیے کوشاں ہے جبکہ پوری کشمیری قوم اپنے حق کےلیے لڑ رہی ہے اور کسی صورت اس حق کو نہیں چھوڑا جا سکتا۔الطاف حسین وانی نے کہا کہ اس سلسلے میں مظفر وانی نے جام شہادت نوش کیا تھا۔اس کانفرنس سے ممتاز کشمیری راہنما زاہد اقبال ہاشمی نے خطا ب کرتے ہوئے کہا کہ بھارت نے ہمیشہ ظلم و جبر کو قائم رکھا آرٹیکل 370 اور 75 اے کو ختم کر کے کشمیریوں کے حق خود ارادیت کو سلب کیا۔اُنہوں نے کہا کہ کشمیروں پر 5 اگست 2019ء کو ہونے والے ظلم کو تاریخ میں ہمیشہ سیاہ حروف سے لکھا جائے گا۔انہوں نے کہا کہ برہان وانی کی شہادت نے مسئلہ کشمیر کے اندر دوبارہ جان ڈال دی، شہید کی موت قوم کی حیات ہے۔زاہد ہاشمی نے 9 مئی 2025ء کے واقعے کو پاکستان اور انڈیا کے درمیان حق و باطل کی جنگ قرار دیتے ہوئے کہا کہ حق باطل کے سامنے ڈٹ گیا اور کامیاب ہوا۔اُنہوں نے کہا کہ افواج پاکستان کی طاقت ایمانی اور جذبہ شہادت نے ساری دنیا میں پاکستان کا نام روشن کیا، پاکستان بے شک انڈیا سے چھوٹا ملک ہے لیکن ہم جنگی مہارت اور حکمت عملی میں سب سے آگے ہیں۔
Post your comments