وفاقی دارالحکومت میں غیر ملکی مہمانوں کی آمد، سیاسی سرگرمیاں بھی جاری

وفاقی دارالحکومت میں جہاں ایک طرف غیر ملکی مہمانوں کی آمد کا آغاز ہورہا ہے اور آنے والے دنوں میں اسلام آباد میں ہونے والی اہم شخصیات کی مصروفیات کو بین الاقوامی صورتحال کے تناظر میں دیکھا جائے گا وہیں دوسری طرف سیاسی سطح پر بھی سرگرمیوں کا سلسلہ جاری ہے اور ان سرگرمیوں کا محور عدالتی اصلاحات کے آئینی ترمیم کا پیکج ہے۔ بدھ کو سعودی عرب کے اعلیٰ سطح کے وفد کی آمد اس سلسلے کا آغاز ہے جبکہ چین کے وزیراعظم لی کیانگ اور روسی وزیراعظم میخائل ولادیمیرووچ مشہوسٹن آئندہ ہفتے پاکستان کا دورہ کریں گے۔ تفصیلات کے مطابق شنگھائی تعاون تنظیم کے اجلاس کے موقع پر پاکستان بین الاقوامی سطح پر توجہ کا مرکز بن گیا۔ اسلام آباد میں سفارتی ذرائع کے مطابق آئندہ ہفتے دو بڑی جوہری اور ویٹو طاقتوں کے وزرائے اعظم پاکستان آئیں گے۔ چین کے وزیراعظم لی کیانگ 14 اکتوبر کو پاکستان پہنچیں گے، ان کے ہمراہ اعلیٰ سطح کا وفد بھی پاکستان پہنچے گا۔ ذرائع کا کہنا ہے کہ چین کے وزیراعظم کا تین روزہ دورہ پاکستان دو حصوں پر مشتمل ہوگا۔

چین کے وزیراعظم لی آئندہ پیر کو پارلیمنٹ کے مشترکہ اجلاس سے خطاب کر یں گے.

اسلام آباد اور بیجنگ میں تفصیلات طے ہورہی ہیں ،اسپیکر قومی اسمبلی سردار ایاز صادق کے مطابق وزیر اعظم شہباز شریف خطاب نہیں کرینگے ،دونوں ممالک میں کئی معاہدوں پر دستخط ہونگے ،وزیراعظم چین سیاسی اور فوجی قیادت سے ملاقاتیں کریں گے،وہ اپنے قیام میں پاکستان کو دہشت گردی اور دوسرے خطرات کے خلاف مکمل تعاون کا یقین دلائیں گے،نو سال بعد کوئی چینی رہنما پاکستان کی پارلیمنٹ سے مخاطب ہوگا صدر شی جن پنگ نے 2015 میں خطاب کیا تھا۔پاکستان کے دورے پر آرہے چین کے وزیراعظم لی شیانگ آئندہ پیر (14 اکتوبر) کو پارلیمنٹ کے مشترکہ اجلاس سے خطاب کرینگے۔ حد درجہ قابل اعتماد سفارتی ذرائع نے بدھ کی شام جنگ /دی نیوز کو بتایا کہ اس خطاب کے حوالے سے تفصیلات طے کی جارہی ہیں اس بارے میں قطعی اعلان اسلام آباد اور بیجنگ سے جاری ہوگا۔ وزیراعظم لی نو سال بعد پاکستان کی پارلیمنٹ سے مخاطب ہونے والے پہلے سرکردہ رہنما ہیں قبل ازیں چین کے موجودہ شی جن پنگ نے 21 اپریل 2015ء کو پارلیمنٹ سے وزیراعظم نواز شریف کی حکومت میں خطاب کیا تھا جبکہ گیارہ سال بعد پاکستان کی پارلیمنٹ سے خطاب کرنے والے اولین وزیراعظم ہیں قبل ازیں وزیراعظم لی ویانگ نے 19 دسمبر 2010ء کو خطاب کیا تھا اس وقت پیپلزپارٹی کے سید یوسف رضا گیلانی ان کے ہم منصب تھے۔

قومی اسمبلی کے اسپیکر سردار ایاز صادق نے بدھ کو استفسار پر بتایا کہ میزبان وزیراعظم شہباز شریف مشترکہ اجلاس سے خطاب نہیں کرینگے۔ ذرائع نے بتایا کہ اسپیکر معزز چینی مہمانوں کے اعزاز میں استقبالیہ بھی ترتیب دینگے جس میں تمام پارلیمانی گروپس کے رہنماؤں کو مدعو کیا جائے گا۔چین کے وزیراعظم اسلام آباد میں اپنے قیام کے دوران صدر آصف علی زرداری، وزیراعظم شہباز شریف اور بعض سرکردہ سیاسی زعما کے علاوہ بری فوج کے سربراہ جنرل سید عاصم منیر سے بھی ملاقات کرینگے۔ وہ پاکستان اور چین کے درمیان طے شدہ معاہدوں پر دستخطوں کی تقریب میں شریک ہونگے۔