حکومتی پیشکش، بریک تھرو کی کوششیں، تحریک انصاف رہنماؤں کی دو بار جیل میں ملاقاتیں

حکومت اورتحریک انصاف کے مابین مذاکرات ‘ بریک تھرو کی کوششیں جاری ‘ پی ٹی آئی رہنماؤں کی اڈیالہ جیل میں دو بار عمران خان سے ملاقات ‘بانی چیئرمین کو حکومتی آپشنزسے آگاہ کیا۔ تفصیلات کے مطابق بیرسٹر گوہر کی سربراہی میں پی ٹی آئی وفد کی بانی پی ٹی آئی سے جیل میں ملاقات ہوئی۔ ذرائع نے بتایا کہ بانی پی ٹی آئی نے حکومتی تجاویز میں سے ایک پر اتفاق کر لیا اور بیرسٹر گوہر کو ویڈیو میسج ریکارڈ کروا دیا۔ ذرائع کا کہنا ہے کہ ویڈیو میسج بشریٰ بی بی، علی امین گنڈاپور اور کارکنوں کےلیے رکارڈ کیا گیا۔ملاقات کیلئے بیرسٹر گوہر کے ہمراہ شبلی فراز اور اسد قیصر بھی اڈیالہ جیل پہنچے ۔ ملاقات کانفرنس روم میں کرائی گئی جوملاقات 40منٹ جاری رہی۔ ذرائع کا کہنا ہےکہ بیرسٹر گوہر نے احتجاج اور حکومت کی طرف سے آپشنز سے بانی پی ٹی آئی کو آگاہ کیا۔قبل ازیں حکومت اور تحریک انصاف کے درمیان دھرنے کے مقام کا تعین کرنے کیلئے مذاکرات ہوئے ‘حکومت کی جانب سے امیر مقام، ایاز صادق، محسن نقوی اور رانا ثنا اللہ جبکہ پی ٹی آئی کی جانب سے اسد قیصر، شبلی فراز اور بیرسٹر گوہر بات چیت میں شریک ہوئے ‘ذرائع کے مطابق مذاکرات میں متفقہ طور پر دھرنا پوائنٹ فائنل کرنے پربات ہوئی ۔ذرائع کا کہنا ہے کہ حکومت کی جانب سے پی ٹی آئی رہنماؤں کو اسلام آباد نہ آنے کی درخواست کی گئی اور مؤقف اختیار کیا گیا ہے کہ بیلاروس کے سرمایہ کاروں کے ساتھ اسلام آباد میں بزنس کانفرنس ہورہی ہے۔ ذرائع نے بتایاکہ پی ٹی آئی کو دھرنے کے لیے پریڈ گراؤنڈ یا پشاور موڑپر جگہ دینے کی پیش کش کی گئی جس کو پی ٹی آئی نے مسترد کردیا۔ذرائع نے بتایاکہ پی ٹی آئی رہنما بانی پی ٹی آئی کی فوری رہائی کے مطالبے پر قائم ہیں اور مؤقف اپنایاکہ بانی پی ٹی آئی کو فوری رہا نہ کیا تو ڈی چوک پہنچیں گے۔ حکومت اور تحریک انصاف کے مذاکرات کااگلادور بھی ہونے کا امکان ہے۔اس سے پہلے مشیر اطلاعات خیبر پختونخوا بیرسٹر سیف اور بیرسٹر گوہر نے اڈیالہ جیل میں بانی پی ٹی آئی عمران خان سے ڈیڑھ گھنٹے تک مشاورت کی، ملاقات کے دوران اسلام آباد میں احتجاج کے معاملے پر مشاورت کی گئی ۔ ملاقات کے بعد میڈیا سے گفتگو کرتے ہوئے بیرسٹرگوہر کا کہناتھاکہ خان صاحب کی احتجاج کی کال فائنل ہے‘ حکومت سے بات چیت چل رہی ہے ‘اس حوالے سے جلد کوئی خبر آئے گی ‘احتجاج منسوخ کرنے والی کوئی بات نہیں ہے ۔ ادھرجیو نیوز کے مطابق پی ٹی آئی ذرائع کا کہنا ہے کہ بشریٰ بی بی نے کہا ہے کہ انہیں کسی اور مقام پر روکنے کی سازش کی جا رہی ہے لیکن مجھے بانی پی ٹی آئی نے ہر صورت ڈی چوک پر پہنچنے کا کہا ہے۔چیئرمین پی ٹی آئی بیرسٹر گوہر نے بشریٰ بی بی اور علی امین گنڈا پور سے رابطہ کیا تاہم مذاکرات کے حوالے سے علی امین نے مکمل خاموشی اختیار کر رکھی ہے۔

اسلام آباد میں ڈی چوک اور اطراف میں سیکیورٹی سخت کر دی گئی اور ڈی چوک کی طرف بڑھنے والوں کو گرفتار کرنے کا فیصلہ کر لیا گیا ہے۔

ریلی کی قیادت کرنے والوں کو بھی گرفتار کرنے کا فیصلہ کیا گیا ہے۔آج پاکستان تحریکِ انصاف (پی ٹی آئی) کا احتجاج تیسرے روز میں داخل ہو گیا ہے۔

پولیس اور پی ٹی آئی کارکنان کی ایک دوسرے پر شیلنگ

بانئ پی ٹی آئی کی اہلیہ بشریٰ بی بی کی قیادت میں پی ٹی آئی کا مرکزی قافلہ جی 11 پہنچ گیا۔پولیس اور پی ٹی آئی کارکنان نے ایک دوسرے پر زیرو پوائنٹ پل پر آنسو گیس سے شیلنگ کی۔پی ٹی آئی کارکنان کی جانب سے پولیس پر پتھراؤ بھی کیا گیا۔

بشریٰ بی بی کا بانیٔ پی ٹی آئی کی بات ماننے سے انکار

ذرائع کے مطابق بانئ پی ٹی آئی نے احتجاج کے لیے متبادل جگہ کی ہامی بھری لیکن بشریٰ بی بی ماننے سے انکاری ہیں۔علی امین گنڈاپور نے پہلے ڈی چوک جانے کی مخالفت کی بعد میں وہ بھی ریڈ زون کی جانب روانہ ہو گئے ہیں۔

بانیٔ پی ٹی آئی کا حکومتی تجاویز میں سے ایک پر اتفاق

بانئ پی ٹی آئی نے حکومتی تجاویز میں سے ایک پر اتفاق کر لیا ہے، حکومت سے بات چیت جاری رکھنے پر بھی اتفاق کیا، ملاقات میں بیرسٹر گوہر کو بانئ پی ٹی آئی نے ویڈیو میسج بھی ریکارڈ کروایا ہے۔ذرائع کا بتانا تھا کہ بانئ پی ٹی آئی نے ملاقات میں ویڈیو پیغام بشریٰ بی بی، علی امین گنڈاپور اور کارکنوں کے لیے ریکارڈ کروایا ہے۔پی ٹی آئی رہنماؤں نے حکومتی وفد سے بات چیت سے بانئ پی ٹی آئی کو آگاہ کیا تھا۔

اسلام آباد میں فوج طلب

دوسری جانب رات گئے شر پسندوں کے ہاتھوں 4 رینجرز اہلکاروں کی شہادت کے بعد وزارتِ داخلہ نے نوٹیفکیشن جاری کرتے ہوئے اسلام آباد میں فوج طلب کر لی ہے اور شر پسندوں کو دیکھتے ہی گولی مارنے کے احکامات جاری کیے ہیں۔ذرائع کے مطابق واقعے میں 5 رینجرز اور پولیس کے جوان شدید زخمی ہوئے ہیں۔

مظاہرین پُرامن احتجاج کریں: امریکا

ادھر ترجمان امریکی محکمۂ خارجہ میتھیو ملر نے مظاہرین سے اپیل کی ہے کہ پُرامن احتجاج کریں اور تشدد سے گریز کریں۔میتھیو ملر نے پریس بریفنگ میں پاکستان سے متعلق بات کرتے ہوئے کہا کہ امن و امان برقرار رکھتے ہوئے پاکستانی قوانین اور آئین کا احترام یقینی بنایا جائے۔ترجمان امریکی محکمۂ خارجہ کا یہ بھی کہنا ہے کہ پاکستانی حکام سے اپیل ہے کہ انسانی حقوق اور بنیادی آزادی کا احترام کریں۔