شکارپور میں ریلوے ٹریک پر دھماکے سے جعفر ایکسپریس کی 4 بوگیاں پٹری سے اتر گئیں۔
ریلوے ٹریک پر دھماکے کے باعث ٹرینوں کی آمدورفت عارضی طور پر معطل ہو گئی۔پولیس کے مطابق واقعے میں 4 مسافر زخمی ہو گئے۔ جنہیں اسپتال منتقل کر دیا گیا ہے۔ اس حوالے سے ایس ایس پی شاہزیب چاچڑ کا کہنا ہے کہ دھماکے کی نوعیت جاننے کے لیے بم ڈسپوزل اسکواڈ طلب کر لی گئی ہے اور تفتیش جاری ہے۔ انہوں نے کہا کہ مسافروں کو بسوں کے ذریعے بھیجنے کے انتظامات کیے جا رہے ہیں۔دوسری جانب ریلوے حکام کا کہنا ہے کہ متاثرہ ٹریک کی مرمت کام شروع کر دیا گیا ہے۔ ٹریک کی مرمت میں 8 سے 10 گھنٹے تک لگ سکتے ہیں۔ وزیراعلیٰ سندھ مراد علی شاہ نے کوٹ سلطان کے قریب ریل کی پٹڑی پر دھماکے کی مذمت کرتے ہوئے آئی جی پولیس سے واقعے کی مکمل رپورٹ طلب کر لی۔ترجمان وزیراعلیٰ سندھ کے مطابق وزیراعلیٰ سندھ نے کمشنر لاڑکانہ کو زخمی مسافروں کو بہترین طبی امداد دینے کی ہدایت کرتے ہوئے کہا کہ ریسکیو ٹیموں کو بھیج کر متاثرہ مسافروں کو بروقت امداد فراہم کی جائے۔آئی جی سندھ نے کہا کہ پولیس اور بم ڈسپوزل اسکواڈ جائے وقوعہ پر موجود ہیں۔
Post your comments