Nawaipakistan.com

امریکی صدر ٹرمپ نے کہا ہے کہ پاک بھارت جنگ کے دوران 7 بالکل نئے اور خوبصورت طیارے مار گرائے گئے، دونوں ملک ایٹمی طاقت ہیں۔ 

ٹرمپ نے یہ بات ٹوکیو میں بزنس لیڈر سے خطاب میں کہی، انہوں نے کہا کہ زیادہ تر جنگیں ٹیرف کی مدد سے رکوائیں اور اسطرح انہوں نے دنیا کی بہت خدمت کی ہے۔ صدر ٹرمپ نے کہا کہ میں نے وزیراعظم نریندر مودی اور پاکستان میں فیلڈ مارشل سے کہا کہ اگر آپ نے جنگ کی تو امریکا آپ سے تجارت نہیں کرے گا۔انہوں نے کہا کہ ایٹمی جنگ کی صورت میں نیوکلیئر ڈسٹ ہر طرف پھیلتی، سب متاثر ہوتے اور امریکا نے ان پر واضح کیا کہ اگر جنگ کی تو ہم تجارتی معاہدے نہیں کریں گے اور اسطرح چوبیس گھنٹے میں معاملہ ختم ہوگیا۔ٹرمپ نے کہا کہ یہ حقیقت میں حیران کن تھا اور ہم نے ایسے کئی اقدامات کیے ہیں۔ صدر ٹرمپ نے مزید کہا کہ جنگیں روکنے میں ستر فیصد حصہ تجارت کا ہے، ہم نے اپنا دماغ استعمال کیا کیونکہ وہ ہم سے تجارت چاہتے ہیں اور حیران کن تھا کہ کتنی جلدی وہ امریکا کے ساتھ معاہدوں کے قابل ہوگئے۔امریکی صدر  نے کہا کہ وہ 10برسوں تک لڑتے رہتے اور اس میں لاکھوں لوگ مارے جاتے، ہم خوش ہیں کہ جنگ روک دی۔

امریکا کے صدر ڈونلڈ ٹرمپ نے کہا ہے کہ پاکستان کے وزیراعظم ایک بہت اچھے آدمی ہیں اور پاکستان کے فیلد مارشل سید عاصم منیر بہت زبردست فائٹر اور بہت اچھے آدمی ہیں۔

جنوبی کوریا میں اپیک سی ای او سمٹ کے ظہرانے میں گفتگو کرتے ہوئے امریکی صدر نے کہا کہ پاکستان اور بھارت کی جنگ میں 7 طیارے مار گرائے گئے، پاکستان اور بھارت آپس میں لڑائی پر اتر آئے تھے، یہ بہت بڑی بات تھی کیونکہ یہ دونوں ایٹمی طاقتیں ہیں۔امریکی صدر نے کہا، ’’میں نے بھارت کے وزیراعظم مودی کو فون کیا اور کہا، ’آپ کے ساتھ تجارتی معاہدہ نہیں کرسکتے‘، مودی نے کہا، ’ہمیں معاہدہ کرنا چاہیے‘، میں نے کہا، ’نہیں معاہدہ نہیں کرسکتے، مودی سے کہا تم پاکستان کے ساتھ جنگ کر رہے ہو، ہم معاہدہ نہیں کریں گے‘۔‘‘ڈونلڈ ٹرمپ نے کہا کہ پاکستان کو بھی فون پر کہا کہ تمہارے ساتھ بھی تجارت نہیں کریں گے کیونکہ تم بھارت سے لڑ رہے ہو، پاکستان اور بھارت دونوں نے کہا کہ نہیں ہمیں لڑنے دو، دو دن میں دونوں ممالک نے فون کیا اور کہا کہ ہم سمجھ گئے اور لڑائی بند کردی۔امریکی صدر نے کہا، ’کیا یہ حیرت انگیز نہیں؟ کیا بائیڈن ایسا کرسکتے تھے؟ مجھے نہیں لگتا۔ میں نے کہا کہ 7 طیارے گر چکے جنگ روکنی ہوگی، میں نے انہیں کہا کہ اگر ایسا نہیں کیا تو میں دونوں ممالک پر 250 فیصد ٹیکس لگا دوں گا۔پاکستان اور بھارت کو کہا کہ 250 فیصد ٹیکس کا مطلب ہے کہ تم کبھی کاروبار نہیں کرسکو گے۔‘ٹرمپ نے کہا کہ 250 فیصد ٹیکس لگانے کا کہنے کا مقصد یہ تھا کہ ہم تمہارے ساتھ کاروبار نہیں کرنا چاہتے، دونوں ممالک سمجھ گئے اور صرف 48 گھنٹوں میں کوئی جنگ نہیں رہی اور کوئی ہلاکت نہیں ہوئی۔امریکی صدر کا مزید کہنا تھا کہ مجھے بہت اچھا لگا کیونکہ ہم نے لاکھوں لوگوں کی زندگیاں بچا لیں۔