اقوام متحدہ کے ذیلی ادارہ یونیسکو کے ہیڈ کوارٹر پیرس میں پاکستان کے سفیر عاصم افتخار احمد اور لوک ہارڈی ایکسپلورر کے تعاون سے تقریب منعقد ہوئی۔اس موقع پر موسمیاتی تبدیلی اور گلیشیئرز پگھلنے جیسے مسائل پر گفتگو کی گئی۔ تقریب کی میزبانی سفیر پاکستان عاصم افتخار احمد اور لوک ہارڈی ایکسپلورر، ماہر ماحولیات، فلم ساز اور کاروباری شخصیت نے کی۔ اس موقع پر دستاویزی فلم کی پریمیئر اسکریننگ کے بعد فیلڈ میں سرفہرست ناموں کے ساتھ پینل ڈسکشن کیا گیا۔ پینل میں شامل موسمیاتی سائسندان ویلیری میسن ڈیلموٹ، برفانی چٹانوں کے ماہرین و سائنسدان پیٹرک ویگنان اور فینی برون، تاجر، ایڈوانچرر اور ماہر ماحولیات لوک ہارڈی اور صحافی و یورپین انسٹیٹوٹ کے اسسٹنٹ ڈائریکٹر فرانکوئس کیرل نے موسمیاتی تبدیلیوں، ماحولیات اور انکے برفانی گلیشئرز پر پڑنے والے اثرات پر سیر حاصل گفتگو کی۔ تقریب میں سفارت کاروں، محققین، ماہرین تعلیم، تھنک ٹینکس، ماحولیاتی ماہرین اور میڈیا و عام لوگوں کی ایک بڑی تعداد نے شرکت کی اور دستاویزی فلم دیکھی اور ماہرین کے ساتھ بحث میں حصہ لیا اور بلند و بالا پہاڑوں اور 7000 سے زائد گلیشیئرز کے تحفظ پر تجاویز پیش کیں۔ تقریب کا مقصد عالمی موسمیاتی بحران، آبادی اور ماحولیاتی نظام پر اس کے اثرات اور چیلنجوں سے نمٹنے کے لیے اقدامات تجویز کرنا تھا۔
Post your comments