توشہ خانہ کیس، بانیٔ پی ٹی آئی اور بشریٰ بی بی کو 14-14 سال قیدِ بامشقت کی سزا

توشہ خانہ کیس میں بانیٔ پی ٹی آئی اور بشریٰ بی بی کو 14-14 سال قیدِ بامشقت کی سزا سنا دی گئی۔راولپنڈی کی اڈیالہ جیل میں احتساب عدالت نے سماعت کرتے ہوئے بانیٔ پی ٹی آئی کو 10 سال کے لیے نااہل بھی قرار دے دیا۔عدالت کی جانب سے بانیٔ پی ٹی آئی اور بشریٰ بی بی پر مجموعی طور پر 1 ارب 57 کروڑ 40 لاکھ روپے جرمانہ عائد کیا گیا ہے۔بانیٔ پی ٹی آئی پر 78 کروڑ 70 لاکھ روپے جبکہ بشریٰ بی بی پر بھی 78 کروڑ 70 لاکھ روپے کا جرمانہ عائد کیا گیا ہے۔سزا سنانے سے قبل جج محمد بشیر نے بانیٔ پی ٹی آئی سے سوال کیا کہ آپ نے اپنا 342 کا بیان جمع کرایا ہے؟بانیٔ پی ٹی آئی نے جواب دیا کہ میں نے بیان تیار کر لیا ہے، اپنے وکلاء کے آنے پر بیان جمع کراؤں گا، مجھے تھوڑا وقت دیں، میرے وکلاء آ رہے ہیں۔جج محمد بشیر نے بانیٔ پی ٹی آئی کو وقت دینے سے انکار کر دیا۔

میرے ساتھ دھوکا ہوا ہے: بانیٔ پی ٹی آئی

بانیٔ پی ٹی آئی نے جج سے کہا کہ آپ کو اتنی جلدی کیوں ہے؟ میرے ساتھ دھوکا ہوا ہے، مجھے تو صرف حاضری کے لیے بلایا گیا تھا۔

بانیٔ پی ٹی آئی کمرۂ عدالت سے چلے گئے

اس موقع پر بانیٔ پی ٹی آئی کمرۂ عدالت سے اٹھ کر اپنی بیرک میں چلے گئے۔عدالت نے بانیٔ پی ٹی آئی کو دوبارہ کمرۂ عدالت میں بلانے کے لیے پیغام بھیجا۔جیل حکام نے عدالت کو آگاہ کیا کہ بانیٔ پی ٹی آئی کمرۂ عدالت میں واپس آنے کے لیے تیار نہیں۔عدالت نے بانیٔ پی ٹی آئی اور بشریٰ بی بی کا نام پکارنے کی ہدایت کی۔عدالتی اہلکار نے اونچی آواز میں بانیٔ پی ٹی آئی اوربشریٰ بی بی کا نام پکارا۔جس کے بعد جج محمد بشیر نے توشہ خانہ ریفرنس کا مختصر فیصلہ سنایا۔مختصر فیصلہ سنانے کے بعد جج محمد بشیر کمرۂ عدالت سے روانہ ہو گئے۔

توشہ خانہ ریفرنس کیا ہے؟

چیئرمین نیب نے بانیٔ پی ٹی آئی اور ان کی اہلیہ بشریٰ بی بی کے خلاف توشہ خانہ ریفرنس پر یکم اگست 2022ء کو توشہ خانہ ریفرنس پر تحقیقات کا حکم دیا۔5 اگست 2022ء کو ڈی جی نیب نے توشہ خانہ ریفرنس پر تحقیقات شروع کیں۔14 جولائی 2023ء کو توشہ خانہ کی تحقیقات تفتیش میں تبدیل ہوئیں۔ریفرنس کے مطابق بطور وزیرِ اعظم بانیٔ پی ٹی آئی اور بشریٰ بی بی نے غیر ملکی سربراہان سے 108 تحائف حاصل کیے، 108 میں سے بانیٔ پی ٹی آئی، بشریٰ بی بی نے 14 کروڑ روپے مالیت کے 58 تحائف اپنے پاس رکھے۔بانیٔ پی ٹی آئی نے سعودی ولی عہد سے موصول جیولری سیٹ انتہائی کم رقم کے عوض اپنے پاس رکھا، توشہ خانہ قوانین کے مطابق تمام تحائف توشہ خانہ میں رپورٹ کرنا لازم ہیں۔دورانِ تفتیش معلوم ہوا کہ بشریٰ بی بی کا سعودی ولی عہد سے جیولری سیٹ تحفے میں ملا، یہ جیولری سیٹ ملٹری سیکریٹری کے ذریعے توشہ خانہ میں رپورٹ تو ہوا لیکن جمع نہیں کروایا گیا۔بشریٰ بی بی اور بانیٔ پی ٹی آئی نے توشہ خانہ قوانین کی خلاف وزری کی، دونوں نے اتھارٹی کا استعمال کرتے ہوئے جیولری سیٹ کی من پسند قیمت لگوائی۔بانیٔ پی ٹی آئی اور بشریٰ بی بی نےجیولری سیٹ 90 لاکھ روپے کی رقم کی ادائیگی کے عوض وصول کیا۔قیمت کا اندازہ لگانے والے پرائیویٹ فرد سے لگوائی گئی جیولری سیٹ کی قیمت انتہائی کم تھی۔جیولری سیٹ کی اصل قیمت لگانے کے لیے دبئی کے ماہر سے بھی رابطہ کیا گیا۔نیب نے بانیٔ پی ٹی آئی اور بشریٰ بی بی کے خلاف گراف جیولری سیٹ کا ریفرنس فائل کیا تھا، جیولری سیٹ میں نیکلس، ایئر رنگس، بریسلٹ اور ایک انگوٹھی شامل تھی۔نیب کے مطابق جیولری سیٹ کی کل مالیت 1 ارب 57 کروڑ 40 لاکھ روپے تھی جس کی بانیٔ پی ٹی آئی اور بشریٰ بی بی نے 90 لاکھ رقم ادا کی تھی۔بانیٔ پی ٹی آئی اور بشریٰ بی بی نے گراف جیولری سیٹ کی قیمت پرائیویٹ فرم سے لگوائی تھی۔توشہ خانہ نیب ریفرنس میں اسلام آباد ہائی کورٹ سے بانیٔ پی ٹی آئی کو ریلیف ملا تھا۔ٹرائل کورٹ نے عدم حاضری پر ضمانت قبل از گرفتاری کی درخواست مسترد کر دی تھی۔اسلام آباد ہائی کورٹ نے ضمانت مسترد کرنے کا فیصلہ کالعدم قرار دیا۔ٹرائل کورٹ کو ضمانت کی درخواست پر دوبارہ سماعت کر کے فیصلے کا حکم دیا گیا تھا۔جیل ٹرائل کےخلاف بانیٔ پی ٹی آئی اسلام آباد ہائی کورٹ سے ریلیف نہیں لے سکے تھے۔توشہ خانہ نیب کیس میں جیل ٹرائل کو ہائی کورٹ نے درست قرار دیا۔اسلام آباد ہائی کورٹ نے جیل ٹرائل کےخلاف بانیٔ پی ٹی آئی کی درخواست گزشتہ روز مسترد کی تھی۔