غزہ میں فضا سے پھینکی گئی امداد کا پیراشوٹ نہ کُھل سکا۔غیرملکی میڈیا کے مطابق پیراشوٹ نہ کُھلنے کی وجہ سے امدادی پیکٹ راکٹ کی تیزی سے ایک گھر کی چھت پر گرے۔رپورٹس کے مطابق جمعے کو اس حادثے میں 5 افراد جاں بحق اور 10 زخمی ہوگئے جنہیں اسپتال منتقل کردیا گیا۔غیرملکی میڈیا کے مطابق کیمپ میں موجود ایک عینی شاہد نے بتایا کہ وہ اور اس کے بھائی نے آٹے کا ایک تھیلا ملنے کی امید میں پیراشوٹ کے ذریعے فراہم کی گئی امداد کا پیچھا کیا لیکن پھر اچانک پیراشوٹ نہیں کھلا اور وہ ایک مکان کی چھت پر راکٹ کی طرح گرا۔غیرملکی میڈیا کے مطابق 50 سالہ شخص نے بتایا کہ واقعے کے 10منٹ بعد میں نے لوگوں کو 3 شہداء اور دیگر زخمیوں کو اسپتال منتقل کرتے دیکھا جو اس مکان کی چھت پر مقیم تھے جہاں امدادی پیکج گرے۔غیرملکی میڈیا کے مطابق غزہ میں 5 ماہ کی اسرائیلی جارحیت کی وجہ سے بھوک اور پیاس کے شکار متاثرین کے لیے امریکا اور اردن کی جانب سے امدادی پیکج فضا سے پھینکے گئے تھے۔دوسری جانب اردن فوج کے ذرائع نے غیرملکی میڈیا کو بتایا کہ اس واقعے میں ان کی فوج ملوث نہیں۔ذرائع نے بتایا کہ جمعے کو غزہ پر ایئر ڈراپ (فضا کے ذریعے امداد) کے دوران کچھ پیراشوٹ نہ کھلنے اور ان کے زمین پر گرنے کا سبب بننے والی تکنیکی خرابی اردنی طیارے کی نہیں تھی۔اس حوالے سے ذرائع نے مزید کہا کہ اردن کے 4 طیاروں نے 5 دیگر ممالک کے ساتھ مل کر یہ فضائی امداد گرائی اور بغیر کسی خرابی کے یہ مشن مکمل کیا گیا۔علاوہ ازیں اس واقعے سے متعلق غزہ کے سرکاری میڈیا کی جانب سے کہا گیا ہے کہ یہ امداد بھیجنے کا بہترین طریقہ نہیں۔
Post your comments