امریکا کی ریاست نیو جرسی میں مسجد کے باہر فائرنگ کر کے امام کو شہید کر دیا گیا۔غیر ملکی میڈیا کے مطابق امام حسن شریف پر بدھ کی صبح مسجد کے باہر فائرنگ کی گئی تھی جبکہ پولیس نے اس واقعے کی وجوہات نہیں بتائی ہیں۔غیر ملکی میڈیا کے مطابق فائرنگ کے واقعے کے بعد نمازیوں نے مسجد محمد میں حسن شریف کی صحت یابی کے لیے دعائیں بھی کیں تاہم وہ زخموں کی تاب نہ لاتے ہوئے جاں بحق ہو گئے۔مسجد کی انتظامیہ کے مطابق مسلح شخص نے نمازِ فجر کے فوراً بعد امام کے قریب پہنچ کر فائرنگ کی جبکہ پولیس نے بتایا ہے کہ امام کو ایک سے زیادہ گولیاں ماری گئیں جس کے بعد انہیں اسپتال لے جایا گیا جہاں وہ سہ پہر میں جاں بحق ہو گئے۔حکام کا کہنا ہے کہ فائرنگ کا واقعہ تعصب یا دہشت گردی کا نہیں لگتا، واقعے کی تفتیش جاری ہے۔غیر ملکی میڈیا کے مطابق نیوز کانفرنس میں ریاست کے اٹارنی جنرل میٹ پلاٹکن نے کہا کہ تفتیش کاروں کو ابھی تک فائرنگ کے مقاصد کا پتہ نہیں چلا ہے۔مسجد کے دیگر ارکان نے واقعے پر شدید دکھ اور افسوس کا اظہار کیا ہے۔غیر ملکی میڈیا کے مطابق مسجد محمد نیووارک میں 1957ء میں تعمیر کی گئی تھی۔قریبی واقع چرچ میں آنے والے عبادت گزاروں کا کہنا ہے کہ وہ اکثر امام حسن شریف کو صبح سویرے فجر کی نماز کی تیاری کرتے ہوئے دیکھا کرتے تھے۔
Post your comments