آپ کی وفات سے عالم اسلام ایک مدبر سیاست دان ، دانش وراور مخلص مذہبی رہنما سے محروم ہو گیا۔
جہلم ( محمد زاہد خورشید) پروفیسر علامہ ساجد میر کا سانحہ ارتحال پوری اُمت مسلمہ کے لیے گہرا صدمہ ہے،ان خیالات کا اظہار جامعہ علوم اثریہ جہلم کے مہتمم اور مرکزی جمعیت اہل حدیث پاکستان کے نائب امیر حافظ عبدالحمید عامر نے اپنے ایک بیان میں کیا، انہوں نے مزید کہا کہ عظیم مذہبی رہنما ہونے کے ساتھ حضرت الامیر ایک جید عالم دین، مدبر، محقق و مصنف، اصول پسند سیاست دان،دانش ور ، مصلح اور داعی و مبلغ تھے۔ نصف صدی کے قریب قریب آپ نے اہل حدیث جماعت کی قیادت کی اور مشکل سے مشکل مرحلہ میں ایک دانا رہنما کا کردار ادا کیا، معاملہ فہمی کا ایک وافر حصہ اللہ تعالیٰ نے آپ کو عطا کر رکھا تھا۔ قائد ملت علامہ احسان الٰہی شہید کے بعد نہایت مشکل وقت میں آپ نے جماعت کو سنبھالا اور اس کا نیٹ ورک چار صوبوں تک عام کرنے میں بھرپور کردار ادا کیا۔انہوں نے مزید کہا کہ پیغام چینل اور اس جیسے کئی ایک بڑے منصوبے آپ کے دورِ امارت کی سنہری یادیں ہیں۔انٹرنیشنل سطح پر آپ نے جماعت کی قیادت کی، عرب ممالک میں اپنی خدمات و حیثیت کا لوہا منوایا۔ حرمین شریفین کے ائمہ تک آپ کا بے حد ادب کرتے اور آپ کو والد کا درجہ دیتے۔ تنظیمی، رفاہی اور تبلیغی خدمات میں آپ کو اہل حدیث تاریخ ہمیشہ جلی حروف میں یاد رکھے گی ۔ اہلیان جہلم کے ساتھ آپ کی بہت یادیں وابستہ ہیں اور خانوادہ حافظ عبدالغفور جہلمی کے ساتھ تو آپ کے مراسم کی داستان کافی پرانی اور طویل ہے۔ ہم دُعا گو ہیں کہ اللہ تعالیٰ حضرت الامیر کی حسنات کو قبول فرما کر نجات کا ذریعہ بنادے۔ جماعت کو آپ کا نعم البدل عطا فرما دے۔اہل خانہ اور جماعتی احباب سے ہم بڑے غمگین دل سے اظہار تعزیت کرتے ہیں۔
Post your comments