نیند کے مسائل سے دوچار ہیں تو ان اسٹریچنگ سے مدد لیجیے

اکثر افراد نیند کے مسائل سے دوچار ہوتے ہیں، انہیں چاہنے کے باوجود بھی نیند نہیں آتی۔ وہ نیند لانے کے لیے مختلف جتن کرتے ہیں، جن میں قدرتی طریقے بھی شامل ہیں۔

نیند لانے کے قدرتی طریقوں میں اسٹریچنگ بھی ایک فائدہ مند تکنیک ہے جسے تقریباً سبھی نظرانداز کرتے ہیں لیکن یہ خاص مشکل بھی نہیں ہے۔اگر رات میں سونے سے پہلے کچھ سادہ سی اسٹریچنگ یا ہلکی پھلکی ورزش کرلیں تو اس سے ناصرف آپ کو پرسکون نیند آئے گی بلکہ آپ کی صحت بھی بہتر رہے گی۔ گزشتہ برسوں کے بہت سے مطالعات سے یہ بات سامنے آئی ہےکہ مراقبے والی حرکات جیسے کہ تائی چی اور یو گا سے نیند کا معیار بہتر ہوتاہے۔ یہ لازمی امر ہے کہ آپ بھررپور نیند لیں گے تو آپ کی زندگی بھی بہتر گزرے گی۔درج ذیل میں ہم کچھ اسٹریچنگ ایکسرسائز کا ذکر کر رہے ہیں، جو آپ رات سونے سے پہلے کے معمولات میں شامل کرسکتے ہیں۔

گردن کی اسٹریچنگ

اس قسم کی اسٹریچنگ سے آپ کے سر، گردن اور کندھوں کی ٹینشن دور ہوتی ہے لیکن اس کے لیے آپ کو آسن بغیر کسی غلطی کے اپنانا ہوگا۔ اسٹریچنگ کے لیے آپ ایک آرام دہ کرسی پر بیٹھ جائیں۔ سیدھے ہاتھ کو اٹھائیں اور اپنے سر کے اوپر سے لے جاکر اپنے بائیں کان کو چھونے کی کوشش کریں۔ اپنے سیدھے کان کو سیدھے کندھے کی طرف جھکائیں، اس پوزیشن پر پانچ سانسیں لیں۔یہی عمل بائیں بازو کے ساتھ دہرائیں، اس دوران آپ مسلسل سامنے دیکھتے رہیں۔ اس کے بعد آپ سر جھکا کر اپنی ٹھوڑی کو سینے سے لگا کر پانچ سانسیں لیں۔ اس کے بعد اپنے سر کو پیچھے لے جاکر (جتنا آرام سے لے جاسکیں) پانچ سانسیں لیں۔ گردن کی اسٹریچنگ سے آپ کو نیند لانے میں مشکل نہیں ہوگی۔

پاؤں کی اسٹریچنگ

اس مشق سے ریڑھ کی ہڈی، کندھوں اور رانوں کا درد کم کرنے میں مدد ملتی ہے اور کمر کا نچلا حصہ بھی بہتر کام کرتا ہے۔ اس کے لیے آپ سامنے کی طرف اپنی ٹانگیں جوڑ کر پھیلا لیں۔ اپنے جسم کو موڑ کر اپنے ہاتھوں کو سامنے لے جا کر اپنے پاؤں کی انگلیاں چھونے کی کوشش کریں۔ آپ کی ٹھوڑی آپ کے سینے سے لگ رہی ہوگی۔ اسی انداز میں اپنے سر کو آرام دہ حالت میں اور اس پوزیشن میں 5 منٹ تک رکھیں۔

بیئر ہگ

یہ ایکسرسائز ایسی ہے، جیسے آپ کسی بھالو کو گلے لگا رہے ہیں۔ اس کے لیے آپ سیدھے کھڑے ہوجائیں، گہری سانس لیں اور اپنے دونوں بازو پھیلا لیں۔ جتنا زیادہ آپ اپنے بازوؤں کو کھول سکتے ہیں کھول لیں، پھر اپنے دونوں بازو ایک دوسرے پر یعنی بائیں بازو کو دائیں بازو پر رکھ کر ایسے دبائیں جیسے آپ خود سے گلے مل رہے ہیں۔ گہری سانسیں لیتے ہوئے اسی انداز میں 30 سیکنڈز تک رہیں۔ پھر بازو کھول کر بازوؤں کی پوزیشن بدل کر 30 سیکنڈز تک یہی انداز ایک بار پھر دہرائیں۔

گھٹنوں کے بل ایکسرسائز

اس قسم کی ورزش آپ کے کولہوں اور کندھوں سے درد اور بے آرامی دور کرنے میں مدد کرتی ہے۔ ایک کرسی، صوفہ یا چھوٹی ٹیبل پر ہاتھ رکھ کر گھٹنوں کے بل جھک جائیں۔ آپ کے گھٹنے اور کولہے بالکل سیدھ میں ہوں۔ فرش سخت ہو تو گھٹنوں کے نیچے کوئی کشن وغیرہ رکھا جاسکتا ہے۔اپنی کمر کو بالکل سیدھا رکھیں اور اپنے دونوں ہاتھوں کو کرسی پر آرام سے رکھیں۔ اس پوزیشن پر 30 سیکنڈز تک رہیں۔ تھوڑا وقفہ لینے کے بعد دو سے تین مرتبہ اس اسٹریچ کو دہرائیں۔ جسم کو راحت ملے گی تو نیند بھی جلدی آئے گی۔

چائلڈ پوز

یہ بھی پہلے بیان کردہ ورزش کی طرح ہے لیکن زیادہ آرام دہ ہے۔ اس سے آپ کی سانس بہتر ہوتی ہے، بدن کو آرام ملتا ہے اور اسٹریس میں کمی آتی ہے جبکہ کمر، کندھوں اور گردن میں کھچاؤ کم ہونے میں مدد ملتی ہے۔ اس کے لیے آپ اپنی ایڑیوں پر بیٹھ کر گھٹنوں کے بل لیٹ جائیں۔ اپنے بازو پھیلا کر اپنا ماتھا زمین پر رکھ دیں اور اپنے بازو پورے پھیلے رہنے دیں۔اپنی گردن کو سپورٹ کریں جبکہ آپ اپنے گھٹنوں یا ماتھے کے نیچے کشن یا تکیہ بھی رکھ سکتے ہیں۔ اس پوزیشن پر اپنی کمر کو سخت رکھتے ہوئے 5 منٹ تک گہری سانسیں لیں۔ اس ورزش کو آپ کسی بھی دوسری ورزش کے درمیان کرسکتے ہیں۔