کینیڈا،سعودیہ، امارات، کویت، قطر اور بحرین،امریکہ،ترکیہ میں آج عیدالفطر

سعودی عرب ، متحدہ عرب امارات ، کویت ، قطر ، بحرین ، فلسطین ،سوڈان،ترکیہ ، روس اور یمن سمیت کئی ممالک میں شوال کا چاند نظر آگیا ، عید الفطر آج اتوار 30 مارچ کو ہوگی،غزہ میں بھی آج عید منائی جائے گی ۔ بیت المقدس کے مفتی اعظم نے بھی اتوار کو عید منانے کا اعلان کردیا ہے۔ امریکا اور کینیڈا میں مسلم کیلنڈر پر عمل کرنے والی تنظیم اسلامک سوسائٹی آف نارتھ امریکا کے اعلان کے مطابق اتوار 30؍ مارچ کو عیدالفطر منائی جائے گی جبکہ رویت ہلال یعنی چاند دیکھ کر آغاز رمضان اور عیدالفطر منانے والی مسلمان تنظیموں اور مساجد کی رویت ہلال کمیٹیاں چاند دیکھے جانے کی شہادتوں کے بعداپنے فیصلوں کا اعلان کریں گی،فرانس بھر میں بھی آج بروز اتوار 30مارچ کو عیدالفطر عقیدت اور جوش جذبہ سے منائی جائے گی۔ بنگلہ دیش ، بھارت، انڈونیشیا، برونائی، ملائیشیا،عراق، شام، ایران، ،اردن اور عمان میں عید کا چاند نظرنہیں آیا جہاں عید الفطرممکنہ طور پیر کے روز ہوگی ، پاکستان میں رویت ہلال کمیٹی کا اجلاس اتوار کے روز ہوگا او ر چاند نظر آنے کی صورت میں یہاں بھی عید پیر کے روز ہوگی ۔ آسٹریلیا میں چاند نظر نہیں آیا جہاں رمضان المبارک 30دنوں کا ہوگا اور عید الفطر پیر کے روز ہوگی ۔ فرانس میں ادارہ منہاج القران ، مسجد قباء ، جامعہ مسجد پیری فیت ، ادارہ فلاح الدارین ، مدنی ایسوسی ایشن سرجی پونتواز اور اسٹاک برک سڈنی پاکستانی مساجد کے علاوہ” مسکے دو پاغی “پیرس کی مرکزی جامعہ مسجد میں نماز عیدالفطر ادا کی جائے گی فقہ جعفریہ امام بار گاہ شاہ نجف ، امامیہ مڈکاسٹر میں نماز عید ادا کریں گے ۔ سعودی عرب میں شوال کا چاند دیکھنے کیلئے مکہ، مدینہ، تبوک اور دمام سمیت 10سے زائد مقامات پر رویت ہلال کمیٹیوں کے اجلاس ہوئے۔ سعودی سپریم کورٹ نے بھی عوام سے شوال کا چاند دیکھنے کی اپیل کی تھی۔ مملکت میں چاند نظر آگیا جس کے بعد عید الفطر آج ہوگی۔ سعودی عرب کی سدیر اور تمیر رصدگاہ میں شوال کا چاند نظر آیا۔ دوسری جانب سعودی شاہی دیوان نے عید الفطر کا اعلان کردیا اور حکم نامے میں کہا گیا ہے کہ مملکت میں شوال کا چاند نظر آنے کی شہادتیں موصول ہوئیں۔شاہی دیوان کے مطابق سعودی عرب میں عیدالفطر اتوار 30 مارچ کو منائی جائے گی، دریں اثناء امریکااور کینیڈا کے تمام مسلمانوں نے 29؍ مارچ کو متفقہ طور پر 29؍ روزے مکمل کرلئے ہیں۔ پہلے سے طے شدہ مسلم کیلنڈر پر عمل کرنے والی تنظیم اسلامک سوسائٹی آف نارتھ امریکا کے اعلان کے مطابق اتوار 30؍ مارچ کو عیدالفطر منائی جائے گی جبکہ رویت ہلال یعنی چاند دیکھ کر آغاز رمضان اور عیدالفطر منانے والی مسلمان تنظیموں اور مساجد کی رویت ہلال کمیٹیاں چاند دیکھے جانے کی شہادتوں کے بعداپنے فیصلوں کا اعلان کریں۔ فلکیاتی گردش اور چاند کی گردش پر سائنسی نقطہ نظررکھنے والے ماہرین کا کہنا ہے کہ 29؍ مارچ کی شام غروب آفتاب کے بعد وسیع و عریض ممالک امریکا اورکینیڈا کےمشرقی ساحلوںاور شہروں میں چاند نظرآنےکے امکانات کم ہیں اور موسمی حالات بھی اس میں رکاوٹ ڈال سکتے ہیں جبکہ مغربی علاقوں یعنی لاس اینجلس اور ویسٹ کوسٹ کےدیگر علاقوں میں چاند نظر آنے کے امکانات روشن ہیں۔ چونکہ نیویارک اور ٹورنٹو سمیت امریکاکے مغربی علاقوں یعنی لاس اینجلس اور وینکور کے درمیان 3؍ گھنٹے ٹائم کا فرق ہے لہٰذا رویت ہلال پر عمل کرنے والی تنظیموں کے عیدالفطر کے بارے میں فیصلے کرنے میں تاخیر کا امکان ہے کیونکہ شہادتوں کیلئے کیلیفورنیا اور ویسٹ کوسٹ میں غروب آفتاب اور چاند نظرآنے کے بارے میں شہادتوںاور فیصلہ کرنے کا انتظار کرنا پڑتا ہے۔

خادم حرمین شریفین شاہ سلمان نے عیدالفطر کے موقع پر ملت اسلامیہ کو مبارک باد دی ہے۔

شاہ سلمان نے کہا کہ اللّٰہ کے شکر گزار ہیں کہ رمضان میں لاکھوں عمرہ زائرین کی خدمت کا موقع ملا۔انہوں نے کہا کہ زائرین کی خدمت کرنے کے لیے مختلف شعبوں سے وابستہ افراد کی کوششوں کو سراہتے ہیں۔ادھر ریاض میں وزارت اسلامی امور نے ایک بیان میں کہا ہے کہ مختلف علاقوں میں عید کی نماز کے لیے 15 ہزار سے زائد اجتماعات ہوں گے۔وزارت اسلامی امور کے مطابق عید کے بڑے اجتماعات مسجد الحرام اور مسجد نبوی میں ہوں گے۔

پاکستان میں شوال کا چاند دیکھنے کے لیے مرکزی رویت ہلال کمیٹی کا اجلاس آج اسلام آباد میں ہوگا۔

آج پاکستان میں شوال کا چاند نظر آنے کا امکان ہے۔پاکستان کے اسپیس ادارے ’’سپارکو‘‘ کا کہنا ہے کہ شوال کا چاند گزشتہ روز پاکستانی وقت کے مطابق تین بج کر اٹھاون منٹ پر تشکیل پا چکا۔’’سپارکو‘‘ کے مطابق اتوار کو غروبِ آفتاب کے وقت چاند کی عمر تقریباً 27 گھنٹے ہوگی۔واضح رہے کہ سعودی عرب، متحدہ عرب امارات، کویت، قطر، بحرین، فلسطین، سوڈان، ترکیہ، روس اور یمن سمیت کئی ممالک میں شوال کا چاند نظر آگیا، ان ممالک میں عید الفطر آج اتوار 30 مارچ کو ہوگی، غزہ میں بھی آج عید منائی جائے گی۔اسرائیلی حملوں کے بعد تباہ حال غزہ میں دوسری عیدالفطر منائی جائے گی، فلسطینی شہریوں کا کہنا ہے کہ عید کے دنوں میں بھی ہم اپنے بچوں کو کچھ نہیں دلا سکتے۔

بھارت میں عیدالفطر پیر کو منانے کا اعلان کیا گیا ہے۔

میڈیا رپورٹ کے مطابق بھارت، بنگلادیش، انڈونیشیا، ملائیشیا اور برونائی میں شوال کا چاند نظر نہیں آیا۔رپورٹ کے مطابق بھارت میں عیدالفطر بروز پیر 31 مارچ کو منانے کا سرکاری اعلان کیا گیا ہے۔

بھارتی ریاست اترپردیش (یو پی) میں عیدالفطر کی نماز سڑک پر ادا کرنے پر پابندی لگانے پر بھارتیہ جنتا پارٹی (بی جے پی) کو تنقید کا سامنا ہے۔

میرٹھ پولیس نے کہا ہے کہ سڑک پر نماز عید ادا کرنے والوں پر مقدمہ درج کریں گے، ان کے پاسپورٹ اور ڈرائیونگ لائسنس منسوخ کردیں گے۔بھارتیہ جنتا پارٹی کو اس فیصلے پر کڑی تنقید کا سامنا ہے، سماج وادی پارٹی کی رکن اقرا حسن نے کہا کہ متحدہ عرب امارات (یو اے ای) جاکر سب کو گلے لگانے والی حکومت 10 منٹ کی عید کی نماز سے پریشان ہے۔انہوں نے بھارتیہ جنتا پارٹی کے اس فیصلے پر کہا ہے کہ بی جے پی 2014ء سے صرف نفرت کو بڑھاوا دے رہی ہے۔بھارتی میڈیا نے بھی سوال اٹھا دیا کہ جب مختلف یاتراؤں کے لیے ہفتوں سڑکیں بند ہوسکتی ہیں تو سال میں دو بار کچھ سڑکیں نماز کے لیے 15 منٹ بند کیوں نہیں کی جاسکتیں؟خود مودی کی کابینہ کے وزیر چراغ پاسوان نے سڑکوں پر عید کی نماز پر پابندی کی مخالفت کردی۔اسی دوران بھارتی ریاست ہریانہ میں عیدالفطر کی چھٹیاں منسوخ کردی گئیں، رکن اسمبلی چوہدری آفتاب نے اس پر تنقید کی۔ہریانہ کے وزیراعلیٰ نایاب سنگھ سائینی نے جواب میں کہا کہ چھٹیوں کو ایشو نہ بنائیں، ہفتے اتوار کو پہلے ہی چھٹی تھی، اس لیے لگاتار چھٹی کا عمل روکنے کےلیے پیر کی چھٹی کو محدود چھٹی قرار دیا گیا ہے۔بھارتی مبصر سندیپ چوہدری نے کہا کہ جب کاوڑ یاترا سڑک پر ہوسکتی ہے، رتھ یاترا سڑک پر ہوسکتی ہے، تو نماز کیوں نہیں؟