ایمرجنسی کے خواب اور آئین کی دیواریں تحریر: نجیم شاہ

یہ ملک خوابوں سے نہیں، دھکوں سے چلتا ہے۔ یہاں آئین صرف کتابوں میں ہوتا ہے، عمل کہیں اور۔ اور جب کسی کو لگتا ہے کہ حالات قابو سے باہر ہو رہے ہیں، تو سب سے پہلے ’’ایمرجنسی‘‘ کا خواب دیکھا جاتا ہے۔ جیسے کوئی کبوتر بلی کو دیکھتے ہی آنکھیں بند کرکے سمجھتی ہے کہ خطرہ ٹل گیا۔ خیبرپختونخواہ میں نومنتخب وزیراعلیٰ سہیل آفریدی کے حلف اُٹھاتے ہی کچھ چہروں پر وہی پرانی بے چینی لوٹ آئی ہے۔ وہی سوال، وہی وسوسے، وہی پرانا خواب — کہ کہیں ایمرجنسی لگا دی جائے، کہیں گورنر راج آ جائے، کہیں آئین کو ’’ضرورت‘‘ کے تحت موڑ لیا جائے۔ لیکن اب آئین وہ ربڑ نہیں رہا جسے ہر طاقتور اپنی مرضی سے کھینچتا تھا۔ اب یہ دیوار بن چکا ہے، اور دیواریں خوابوں کو روکنے کے لیے ہوتی ہیں۔
سہیل آفریدی کوئی عام وزیرِ اعلیٰ نہیں۔ وہ عمران خان کا منتخب کردہ اوپننگ بیٹسمین ہے۔ اگر وہ اپنے قائد کی پالیسی سے ہٹنے والے ہوتے، تو علی امین گنڈاپور کو رخصت کرنے کی نوبت ہی نہ آتی۔ گنڈاپور کا انداز جارحانہ تھا، لیکن شاید وہ اس جارحیت کو اس انداز میں نہیں برت سکے جس کی توقع عمران خان کو تھی۔ بانی تحریکِ انصاف نے سہیل آفریدی کو میدان میں اُتار کر یہ واضح کر دیا ہے کہ خیبرپختونخواہ اب صرف ایک صوبہ نہیں، بلکہ ایک بیانیہ ہے۔ اور یہ بیانیہ وہی ہے جو عمران خان برسوں سے دہراتے آئے ہیں: مزاحمت، خودمختاری، اور مرکز سے فاصلہ۔ سہیل آفریدی کا خاموش لہجہ، اُن کے محتاط بیانات، اور اُن کی سیاسی تربیت سب کچھ اس بات کی گواہی دیتے ہیں کہ وہ اپنے کپتان کے حکم کے تابع ہیں۔
یہی وجہ ہے کہ سہیل آفریدی کو وزیراعلیٰ منتخب نہ کرانے کے لیے ایڑی چوٹی کا زور لگایا گیا۔ وفاقی وزراء و دیگر حکومتی نمائندوں کے بیانات ایسے تھے کہ گویا اُن کا انتخاب قومی سلامتی کے خلاف کوئی سازش ہو۔ بار بار کہا گیا کہ ہم کسی طور بھی انہیں منتخب نہیں ہونے دیں گے۔ لیکن جب پی ٹی آئی نے عددی اکثریت حاصل کر لی اور عدالتی حکم پر گورنر کو حلف لینا پڑا، تو وہی چہرے خاموش ہو گئے۔ اب سوال یہ ہے کہ ایسا وزیراعلیٰ ، جو عمران خان کی پالیسی کو اپنائے، اُسی کے حکم کے تحت پالیسیاں بنائے، اور مرکز کے سامنے جھکنے کے بجائے سوال اُٹھائے — ایسا شخص وفاق کو کیسے ہضم ہو گا؟
کیا وفاقی حکومت اس ’’نئے خیبرپختونخواہ‘‘ کو برداشت کر پائے گی؟ یا پھر وہی پرانا خواب دیکھا جائے گا — ایمرجنسی کا، گورنر راج کا، آئینی مداخلت کا؟ لیکن اٹھارہویں ترمیم نے صدر کے ہاتھ سے وہ چھڑی چھین لی ہے جس سے وہ اسمبلیاں ہانکا کرتے تھے۔ اب گورنر راج لگانا ہو تو پارلیمان کی منظوری چاہیے، آئینی جواز چاہیے، اور سب سے بڑھ کر، عوامی برداشت چاہیے۔ یعنی اب وہ دن گئے جب ایک فون کال پر صوبہ معطل ہو جاتا تھا۔ اب آئین کی شقیں صرف کتابوں میں نہیں، بلکہ طاقتوروں کے گلے کی ہڈی بن چکی ہیں — نہ نگل سکتے ہیں، نہ اُگل سکتے ہیں۔
افغانستان کیساتھ کشیدگی اور دہشتگردی کے واقعات نے خیبرپختونخواہ کو ایک سیکیورٹی فرنٹ لائن بنا دیا ہے۔ لیکن عمران خان کے حکم پر سہیل آفریدی کی پالیسی ہے: ’’ہم اپنے فیصلے خود کریں گے‘‘۔ یہ بات وفاقی حکومت کو ہضم نہیں ہو رہی۔ وہ چاہتے ہیں کہ صوبہ اُن کی ہاں میں ہاں ملائے، چاہے حالات کچھ بھی ہوں۔ لیکن آفریدی صاحب کا لہجہ بتا رہا ہے کہ وہ ’’ہاں‘‘ کے بجائے ’’کیوں‘‘ پوچھنے والے ہیں۔ اور جب کوئی ’’کیوں‘‘ پوچھتا ہے، تو ہمارے ہاں اُسے ’’باغی‘‘ سمجھا جاتا ہے۔ یہ وہی سوچ ہے جو اختلاف کو جرم بنا دیتی ہے۔ اور جب جرم کی تعریف میں اختلاف شامل ہو جائے، تو جمہوریت صرف تقریروں میں رہ جاتی ہے، عمل میں نہیں۔
ماضی میں ایمرجنسی اور گورنر راج کے کئی واقعات ہوئے۔ 1977ء میں جنرل ضیاء نے مارشل لا لگایا، 1999ء میں مشرف نے نواز شریف حکومت کا تختہ اُلٹا، 2007ء میں عدلیہ کے خلاف ایمرجنسی لگائی گئی، 2009ء میں پنجاب میں گورنر راج نافذ ہوا جب شہباز شریف کی حکومت معطل کی گئی، اور 2013ء میں بلوچستان میں دہشتگردی کے بعد گورنر راج لگایا گیا۔ لیکن یہ سب اُس وقت ہوا جب آئین ’’لچکدار‘‘ تھا۔ اب آئین ’’جمہوری‘‘ ہو چکا ہے، کم از کم کاغذوں میں۔ عمل اب بھی طاقت کے تابع ہے، لیکن آئینی بندشیں اب طاقتور کے لیے بھی رکاوٹ بن چکی ہیں۔ اور یہی وہ دیوار ہے جس پر ایمرجنسی کے خواب ہر بار ٹکرا کر چکنا چور ہو جاتے ہیں۔
نئے وزیراعلی کی وفاق سے ٹکراؤ کی پالیسی صوبے کے لیے نقصان دہ بھی ثابت ہو سکتی ہے۔ ترقیاتی فنڈز رُک سکتے ہیں، وفاقی منصوبے تعطل کا شکار ہو سکتے ہیں، اور سیکیورٹی تعاون میں کمی آ سکتی ہے۔ لیکن اگر یہ روش عوامی شعور اور حمایت کے سائے میں پروان چڑھی، تو یہ صوبائی خودمختاری کی ایک نئی مثال بن سکتی ہے۔ سوال یہ ہے کہ کیا لوگ اس ’’نئے پاکستان ‘‘ کو سمجھنے اور سنبھالنے کے قابل ہیں، یا وہ اب بھی پرانے پاکستان کے خواب میں زندہ ہیں، جہاں ہر فیصلہ اسلام آباد سے آتا تھا اور اختلاف رائے غداری کہلاتی تھی۔ یہ صرف ایک سیاسی موڑ نہیں، بلکہ آئینی شعور کی آزمائش ہے۔ بصیرت جاگ گئی تو تاریخ بدل سکتی ہے، سو گئی تو ایک اور ’’باغی‘‘ وقت کے حاشیے پر دفن ہو جائے گا۔