Nawaipakistan.com

امریکا میں 44 سالہ خاتون کو انتہائی زہریلی مکڑیوں کے جھرمٹ نے حملہ کر کے زخمی کر دیا۔ نیو یارک پوسٹ کے مطابق جیسیکا روگ اٹلانٹا میں اپنے گھر کے باہر ایک شیڈ کی صفائی کر رہی تھی جب ان پر مکڑیوں نے حملہ کیا اور 24 گھنٹوں سے کم وقت کے بعد انہیں اسپتال منتقل کرنا پڑا، جیسیکا روگ کا چہرہ، بازو اور گلا سوج گیا تھا اور انہیں جسم پر دھبے پڑ گئے تھے۔میڈیا کے مطابق براؤن ریکلوز مکڑی کے کاٹنے سے جلد پر زخم ہو جاتے ہیں اور سنگین حالات میں موت بھی ہو سکتی ہے، جیسیکا روگ کو مکڑیوں نے متعدد جگہوں پر کاٹا تھا، جس کی وجہ سے اس کا چہرہ سوج گیا تھا اور جسم میں جلن محسوس ہو رہی تھی۔اس حوالے سے  جیسیکا روگ کا کہنا ہے کہ میں ابھی وہاں جھاڑو لگا رہی تھی کہ  مجھے فوراً ہی اپنی آنکھ کے پاس کچھ محسوس ہوا، میں نے دیکھا وہ مکڑیاں تھیں۔ انہوں نے کہا کہ جہاں میں صفائی کر رہی تھی وہاں مکڑیوں کا ایک گندا جالا تھا اور میں اسے صاف کرنے کی کوشش کر رہی تھی۔جیسیکا روگ کا کہنا ہے کہ میں اپنی آنکھ کے بارے میں فکر مند ہوں، میری آنکھ میں بہت درد ہو رہا ہے، میں نہیں جانتی کہ میری آنکھ کے ساتھ کیا ہونے والا ہے۔میڈیا رپورٹس کے مطابق جیسیکا روگ کو اسپتال سے گھر منتقل کر دیا گیا ہے اور وہ صحت یاب ہو رہی ہیں، ان کے چہرے پر سوجن کافی حد تک کم ہو گئی ہے تاہم خارش اور دھبے ابھی بھی ہیں۔