وزیراعظم کی ٹیکس نادہندگان کے خلاف کارروائیوں میں تیزی لانے کی ہدایت

وزیراعظم شہباز شریف نے وزارت خزانہ کو ہدایت کی ہے کہ ٹیکس نادہندگان کے خلاف کارروائیوں میں تیزی لائی جائے۔ ان کا کہنا تھا کہ ٹیکس چوری کرنے والوں اور ان کی معاونت کرنے والوں کو کیفر کردار تک پہنچا کر رہیں گے۔

وزیرِ اعظم شہباز شریف کی زیرِ صدارت معیشت کی صورتحال پر جائزہ اجلاس ہوا۔ اسلام آباد سے جاری اعلامیہ کے مطابق اجلاس میں وزارتِ خزانہ نے آئی ایم ایف کے وفد سے ہونے والی ملاقاتوں پر بریفنگ دی۔ اس موقع پر وزیر اعظم نے کہا ملک معاشی استحکام کی جانب گامزن ہے، معیشت کی ترقی کےلیے اقدامات کی بدولت اسٹاک مارکیٹ میں تیزی کا رجحان ہے۔انھوں نے کہا بیرونی سرمایہ کار حکومتی پالیسیوں پر اعتماد کا اظہار کر رہے ہیں۔ عوامی ریلیف کو ہر دوسرے اقدام پر ترجیح دی جائے۔ عوام سے کیے گئے وعدوں کو پورا کرنے کےلیے ہر ممکن اقدام کر رہے ہیں۔ وزیرِ اعظم نے کہا مہنگائی کی شرح 38 فیصد سے کم ہو کر 7 فیصد پر آگئی۔ شرح سود 22 فیصد سے کم ہو کر 15 فیصد پر آگئی ہے، شرح سود میں کمی سے کاروباری سرگرمیوں میں اضافہ اور روزگار کے مواقع پیدا ہوں گے۔انھوں نے کہا برآمدات میں اضافہ اور ریکارڈ ترسیلاتِ زر سے زرمبادلہ کے ذخائر میں اضافہ ہوا۔ زرعی شعبے میں اصلاحات پر وزیرِ اعلیٰ پنجاب اور پنجاب حکومت کو خراجِ تحسین پیش کرتا ہوں۔وزیرِ اعظم نے واضح ہدایت کی کہ ٹیکس نادہندگان کے خلاف کارروائیوں میں تیزی لائی جائے۔ ٹیکس چوری کرنے والوں اور انکی معاونت کرنے والوں کو کیفر کردار تک پہنچا کر رہیں گے۔ انکا کہنا تھا کہ ملکی معیشت کی ترقی تب ہی ممکن ہے جب سب اپنے حصے کی ذمہ داری پوری کریں گے۔ تمام شعبہ جات کو ٹیکس ادا کر کے ملکی ترقی میں اپنا کردار ادا کرنا ہوگا۔ اعلامیہ کے مطابق اجلاس کو معیشت کے اعشاریوں اور مہنگائی کی موجودہ صورتحال، ٹیکس چوری اور ان کی معاونت کرنے والوں اور ان کے خلاف کارروائی پر بریفنگ بھی دی گئی۔

وفاقی وزیر خزانہ محمد اورنگزیب نے کہا ہے کہ تنخواہ دار اور مینوفیکچرڈ طبقے پر مزید بوجھ نہیں ڈالا جاسکتا‘ رئیل اسٹیٹ ‘زراعت اور ہول سیلرز سمیت تمام شعبوں کو ٹیکس نیٹ میں آنا ہوگا‘ .

آئی ایم ایف اوردیگر عالمی مالیاتی اداروں نےتعریف کی کہ 14 ماہ میں ایک ملک کیسے ان خساروں کو سرپلس میں لے کر آیا اور کس طرح ان اہداف کو حاصل کیا گیا‘ .عالمی مالیاتی فنڈکے ساتھ مثبت مذاکرات کے باوجود ہم اطمینان سے نہیں بیٹھ سکتے ‘معیشت کے ساتھ ساتھ میثاق ماحولیات پر بھی دستخط کرنا ہوں گے‘یہ آئی ایم ایف کا نہیں‘پاکستان کا اپنا پروگرام ہے‘ معیشت مستحکم ہورہی ہے ‘وزیراعظم جلد معاشی روڈ میپ پیش کریں گے‘ چاروں وزراءاعلیٰ نے معیشت کی بہتری کے لیے تعاون کا یقین دلایا ہے‘ ملکی بہتری کیلئے سب کو مل کر کام کرنا ہو گا‘ہم ملک کو واپس اس صورتحال پر نہیں لے جانا چاہتے جہاں اس سے پہلے پہنچ گیا تھا‘ حکومتی اقدامات کے نتیجے میں مہنگائی اور شرح سود میں کمی آگئی‘معیشت کی بہتری کیلئے مقررہ اہداف حاصل کریں گے اور تمام شعبوں میں اصلاحات جاری رہیں گی تاہم ملکی مفاد کے خلاف کوئی کام نہیں کریں گے۔ اتوارکوٹی وی پر اپنے خطاب میں وزیر خزانہ محمد نے چارٹر آف اکانومی اور چارٹر آف انوائرمنٹ پر بیک وقت دستخط کرنے کا مطالبہ کردیا۔ انہوں نے کہا کہ رئیل اسٹیٹ ‘ہول سیلرز اور زراعت سے آمدنی حاصل کرنے والوں سمیت ہر ایک کو ٹیکس نیٹ میں آنا ہوگا جیساکہ اسے تنخواہ دار اور مینوفیکچرڈ طبقے سے زیادہ وصول نہیں کیا جا سکتا۔اپنی تقریر میں وزیر خزانہ نے کہا کہ مقداری اور معیاری اہداف کے حوالے سے آئی ایم ایف کے ساتھ کیے گئے تمام وعدے شفاف ہیں اور آئی ایم ایف کی ویب سائٹ پر رکھے گئے ہیں۔ انہوں نے کہا کہ یہ پاکستان کا پروگرام ہے جو آئی ایم ایف کی جانب سے منعقد کیا جاتا ہے، اس کی حمایت کرتا ہے، مدد کرتا ہے اور فنڈ فراہم کرتا ہے اور گزشتہ ہفتے آئی ایم ایف کے دورہ پاکستان میں کوئی ایسی خفیہ بات نہیں تھی جو زیر بحث آئے۔ آئی ایم ایف کی ٹیم نے ٹیکس اصلاحات، توانائی اصلاحات، ایس او ایز اصلاحات اور پبلک فنانس پر تبادلہ خیال کیا۔ ان کا کہنا تھا کہ اس میں کوئی تعجب کی بات نہیں ہے اور میں آئی ایم ایف کے اس دورے کا خیرمقدم کرتا ہوں جیساکہ بات چیت جاری ہے کیونکہ بات چیت کے ذریعے باہمی اعتماد پروان چڑھتا ہے۔ انہوں نے کہا کہ قومی مالیاتی معاہدہ ساختی معیار تھا جو ستمبر 2024کے آخر تک نافذ ہو گیا۔ انہوں نے مزید کہا کہ حکومت نے پبلک فنانس کے تحت رائٹ سائزنگ کا اپنا منصوبہ شیئر کیا جیساکہ مقصد کے حصول کا روڈ میپ آئی ایم ایف کے ساتھ زیر بحث آیا تھا۔

ایگریکلچر انکم ٹیکس (اے آئی ٹی) کی پیروی کی گئی اور انہوں نے اس ایجنڈے کو آگے بڑھانے کے لیے چاروں وزرائے اعلیٰ کا شکریہ ادا کیا۔ انہوں نے کہا کہ پاکستان نے ایک بار پھر آئی ایم ایف سے موسمیاتی فنانسنگ کی درخواست کی ہے اور مزید کہا کہ اے ڈی بی پہلے ہی موسمیاتی لچک کے لیے 500ملین ڈالر کا قرضہ دے چکا ہے۔ آبادی میں اضافہ ہر صورت برقرار نہیں رہ سکتا۔ انہوں نے کہا کہ موسمیاتی ایمرجنسی اور فضائی آلودگی ہمارے سامنے پڑے ہوئے مسائل ہیں۔ انہوں نے کہا کہ جڑواں خسارے سرپلسز میں بدل گئے اور کثیر جہتی اور دو طرفہ شراکت داروں کی جانب سے پیغام موصول ہوا کہ انہوں نے 14ماہ کی مختصر مدت میں معیشت میں تبدیلی لانے پر ملک کی تعریف کی۔ ’’مطمئن ہونے کی کوئی گنجائش نہیں اور راستے پر ہی رہنا‘‘ یہ کثیر جہتی اور دو طرفہ شراکت داروں کی جانب سے موصول ہونے والا پیغام بھی تھا۔