صدر مملکت آصف علی زرداری نے پاکستانی اور چینی کمپنیوں کے درمیان صنعتی تعاون کی تین مفاہمت کی یادداشتوں (ایم او یوز) پر دستخط کی تقریب میں شرکت کی، تقریب سے خطاب کرتے ہوئے صدر مملکت نے کہا کہ یہ مفاہمت کی یادداشتیں پاکستان اور چین کے درمیان ان شعبوں میں تعاون کے نئے دروازے کھولیں گی جو براہِ راست پاکستان کی معاشی ترقی اور عوامی بہبود کیلئے معاون ہیں،صدر مملکت نے شنگھائی میں ہائی کوالٹی آپریشن ایلیٹ پروگرام میں شریک پاکستانی ماہرین سے بھی ملاقات کی ۔ ایوان صدر کے پریس ونگ سے جمعہ کو جاری بیان کے مطابق پہلی مفاہمت کی یادداشت لویانگ ماڈرن بائیو ٹیکنالوجیز اور حکومتِ سندھ کے درمیان طے پائی ۔صوبائی وزیر ناصر شاہ نے سندھ حکومت کی نمائندگی کی جس کا محور پاکستان کی لائیو سٹاک صنعت کو جدید بنانا ہے۔ دوسری مفاہمت کی یادداشتِ بیجنگ ایشین افریقہ لونگیو اور اے ایس ایم سروسز کے درمیان طے پائی، جو پاکستان میں ایک جدید ٹیکسٹائل انڈسٹریل پارک کی تشہیر اور تعمیر سے متعلق ہے۔تیسری مفاہمت کی یادداشتِ سیچوان چوانکساؤ فائر ٹرکس مینوفیکچرنگ کمپنی اور اے ایس ایم سروسز کے درمیان طے پائی، جو پاکستان کیلئے فائر ٹرکس اور جدید ایمرجنسی آلات کی فراہمی، تقسیم، فروخت اور بعد از فروخت خدمات میں تعاون کا فریم ورک طے کرتی ہے۔
Post your comments