بنگلادیش کے نومنتخب ارکان نے حلف اٹھا لیا

بنگلادیش کے نومنتخب اراکین پارلیمنٹ نے حلف اٹھا لیا۔

نومنتخب ارکان کی تقریبِ حلف برداری ڈھاکا میں ہوئی۔

بنگلادیش کے چیف الیکشن کمشنر نے اراکین پارلیمنٹ سے حلف لیا۔

بنگلادیشی اخبار کے مطابق حلف برداری کے کچھ دیر بعد بی این پی پارلیمانی پارٹی کا اجلاس ہو گا، بی این پی پارلیمانی پارٹی اجلاس میں اپنے قائد کا انتخاب کرے گی۔

بنگلادیشی اخبار کا کہنا ہے کہ بنگلادیش کے صدر محمد شہاب الدین مقامی وقت شام 4 بجے کابینہ سے حلف لیں گے۔

نگلا دیش کے عبوری سربراہ محمد یونس نے گزشتہ روز قوم سے الوداعی خطاب میں اپنے عہدے سے مستعفی ہونے کا اعلان کیا اور اقتدار منتخب حکومت کے حوالے کر دیا۔

غیر ملکی میڈیا رپورٹس کے مطابق 85 سالہ نوبیل امن انعام یافتہ رہنما نے قوم سے خطاب میں کہا کہ آج عبوری حکومت مستعفی ہو رہی ہے۔

انہوں نے کہا کہ جمہوریت، آزادیٔ اظہار اور بنیادی حقوق کی جو مشق شروع ہوئی ہے، اسے رُکنا نہیں چاہیے۔

واضح رہے کہ محمد یونس اگست 2024ء میں خود ساختہ جلا وطنی ختم کر کے وطن واپس آئے تھے۔

ان کی یہ واپسی اس وقت ہوئی تھی جب سابقہ وزیرِ اعظم شیخ حسینہ کی سخت گیر حکومت کو طلبہ کی قیادت میں ہونے والی عوامی تحریک نے اقتدار سے ہٹا دیا تھا، وہ ہیلی کاپٹر کے ذریعے بھارت فرار ہو گئی تھیں۔

محمد یونس نے اس دن کو یاد کرتے ہوئے کہا کہ وہ عظیم آزادی کا دن تھا، کیا ہی خوشی کا دن تھا، دنیا بھر میں بنگلا دیشیوں نے خوشی کے آنسو بہائے، ہمارے نوجوانوں نے ملک کو ایک عفریت کی گرفت سے آزاد کرایا۔

انہوں نے اس کے بعد بطور چیف ایڈوائزر بنگلا دیش کی قیادت کی اور اب گزشتہ ہفتے ہونے والے انتخابات میں بھاری اکثریت سے کامیابی پر بنگلادیش نیشنلسٹ پارٹی (بی این پی) اور اس کے قائد طارق رحمٰن کو مبارکباد دیتے ہوئے اقتدار منتقل کر دیا۔

محمد یونس نے کہا کہ عوام، ووٹرز، سیاسی جماعتوں اور انتخابی عمل سے وابستہ اداروں نے قابلِ تحسین مثال قائم کی ہے، یہ انتخابات آئندہ کے لیے ایک معیار طے کر گئے ہیں۔

60 سالہ طارق رحمٰن جو بی این پی کے سربراہ اور ملک کے بااثر سیاسی خانوادوں میں سے ایک کے چشم و چراغ ہیں، آج وزیرِ اعظم کا حلف اُٹھائیں گے اور 17 کروڑ آبادی والے جنوبی ایشیائی ملک کی قیادت سنبھالیں گے۔