پشتو فلم انڈسٹری کے معروف اداکار آصف خان کا کہنا ہے کہ 5 سال ہو گئے بیٹے بہو سے ملاقات نہیں ہوئی ہے۔
حال ہی میں ایک صحافی کو انٹرویو دیتے ہوئے اداکار آصف خان نے اپنے بیٹے و اداکار ارباز خان اور ان کی اہلیہ و اداکارہ خوشبو سے ناراضگی پر بات کرتے ہوئے کہا کہ نہ وہ ہم سے تعلق رکھتے ہیں نہ ہم ان سے ملتے ہیں، خوشبو سے شادی کرنا میرے بیٹے کی بڑی غلطی تھی۔انہوں نے صحافی کے سوال کا جواب دیتے ہوئے کہا کہ ہماری گھر میں کوئی سیٹی تک نہیں بجا سکتا ہم اتنے سادے اور اچھے لوگ ہیں، مجھے سمجھ نہیں آتا کہ ارباز خان نے اس سے شادی کیوں کی، اس نے کم عمری میں گلیمر سے بھری دنیا دیکھی اور اس میں پھنس کر رہ گیا۔ان کا کہنا ہے کہ خیر اب تو جو ہو گیا سو ہو گیا، اب ارباز اور خوشبو کے 2 خوبصورت جوان بچے ہیں۔بیٹے بہو سے ملاقات کے حوالے سے پوچھے گئے سوال کا جواب دیتے ہوئے آصف خان نے کہا کہ ارباز کی خوشبو سے شادی میں ہماری مرضی شامل نہیں تھی لیکن ہم نے اسے خوشبو سے شادی کرنے سے نہیں روکا، ان کی اپنی زندگی ہے، ہم بالکل مختلف لوگ ہیں، میں اپنے بیٹے کو نہیں روک سکتا تھا کیونکہ جوان خون ہمیشہ جذباتی ہوتا ہے، اگرچہ میں نے اس کی رہنمائی کی، لیکن اب میں اس سے ناراض نہیں ہوں، اللّٰہ اسے ہدایت دے میں صرف اتنا کہہ سکتا ہوں۔
Post your comments