مریضوں کو سپیشلسٹ ڈاکٹرز کی زیر نگرانی بہترین علاج ،نیزرہائش اور کھانا بالکل فری فراہم کیا جاتا ہے۔
جہلم(نامہ نگار )جامعہ علوم اثریہ، مشین محلہ نمبر 1، جہلم کے زیر اہتمام اور الابراہیم آئی ہاسپٹل ملیر، کراچی کے زیرِ انتظام 24 واں سالانہ دو روزہ فری آئی کیمپ 14 اور 15 اکتوبر 2026ء بروز بدھ اور جمعرات کو منعقد کیا جا رہا ہے، جس میں آنکھوں کے تفصیلی معائنے، چیک اپ اور آپریشن کا وقت صبح 8:00 بجے سے لے کر شام 6:00 بجے تک مسلسل مقرر کیا گیا ہے۔ غریب، مستحق اور سفید پوش مریضوں کو بینائی کے علاج کی جدید ترین اور معیاری سہولیات بالکل مفت فراہم کرنے کے لیے لگائے جانے والے اس خیراتی کیمپ میں پاکستان اور بین الاقوامی شہرت یافتہ، انتہائی تجربہ کار آئی اسپیشلسٹ سرجنز اور ماہر ڈاکٹرز کی خصوصی ٹیمیں اپنی خدمات سرانجام دیں گی جو جدید ترین طبی آلات کی مدد سے مریضوں کی آنکھوں کا تفصیلی معائنہ اور علاج تجویز کریں گی، جب کہ جن مریضوں کو سرجری کی ضرورت ہوگی ان کے تمام آپریشن جدید لیزر ٹیکنالوجی (بغیر ٹانکے کے) کے ذریعے کیے جائیں گے اور ان کی آنکھوں میں اعلیٰ معیار کے آئی او ایل (IOL) لینس بھی مکمل طور پر مفت لگائے جائیں گے۔ دورانِ علاج تمام ضروری ادویات کی فراہمی کے ساتھ ساتھ ان کے لیے بہترین رہائش اور معیاری کھانے پینے کی تمام سہولیات بلا معاوضہ اور فری فراہم کی جائیں گی، لہٰذا شہری اس سنہری موقع سے بھرپور فائدہ اٹھانے کے لیے مقررہ تاریخ اور وقت پر تشریف لائیں۔
