وزیراعظم کا کفایت شعاری اقدامات کا اعلان

توانائی بحران سے نمٹنے کے لیے حکومت نے اہم فیصلے کرلیے، دفاتر ہفتے میں چار دن کھلیں گے، بیشتر سرکاری اور نجی اداروں کا 50 فیصد عملہ گھر سے کام کرے گا، اسکولوں میں دو ہفتے کی چھٹیاں دے کر آن لائن کلاسز کرائی جائیں گی۔

قوم سے اہم خطاب میں وزیراعظم شہباز شریف نے کہا ہے کہ خطے کو درپیش سنجیدہ اور پر خطر مسئلے پر آپ سے مخاطب ہوں، امن کو لاحق خطرات ہم سب کےلیے تشویش کا باعث ہیں۔

انہوں نے کہا کہ پاکستان کو مغربی سرحدوں پر دہشت گردی کا سامنا ہے، مسلح افواج بہادر سپہ سالار کی قیادت میں وطن کی سلامتی اور خود مختاری کا تحفظ یقینی بنانے کی جدوجہد کر رہی ہیں۔

شہباز شریف نے کہا کہ علی خامنہ ای اور ان کے اہل خانہ کی شہادت پر پاکستان گہرے دکھ کا اظہار کرتا ہے۔

وزیراعظم نے یہ بھی کہا کہ سعودی عرب، کویت، قطر، بحرین اور دیگر ملکوں پر حملوں کی مذمت کرتے ہیں، خلیجی ملکوں پر حملوں سے خطے کے امن کو شدید خطرات لاحق ہیں۔

اُن کا کہنا تھا کہ پاکستان آزمائش کی گھڑی میں ان ملکوں کے ساتھ شانہ بہ شانہ کھڑا ہے، پاکستان ان ملکوں کی سلامتی کو اپنی سلامتی کا حصہ سمجھتا ہے۔

وزیراعظم کا اہم حکومتی اقدامات کا اعلان

وزیراعظم نے اعلان کیا کہ آئندہ 2 ماہ کے لیے سرکاری محکموں کی گاڑیوں کو ملنے والے تیل میں 50 فیصد کٹوتی کی جارہی ہے، اس فیصلے میں ایمبولنس اور عوامی استعمال کی بسیں شامل نہیں۔

انہوں نے کہا کہ تیل کی بچت کےلیے تمام سرکاری محکموں کی 60 فیصد گاڑیوں کو 2 ماہ کے لیے بند کیا جارہا ہے، ہفتے میں صرف 4 دن دفاتر کھلیں گے، تیل کی بچت کےلیے ہفتے میں 1 دن کی اضافی چھٹی دی جارہی ہے، اس کا اطلاق بینکوں پر نہیں ہوگا، صنعت اور زراعت کے شعبوں پر ورک فرام ہوم اور ہفتے کی اضافی چھٹی کا اطلاق نہیں ہوگا۔

شہباز شریف نے مزید کہا کہ فوری طور پرتمام اسکولوں کو رواں ہفتے کے آخر سے 2 ہفتوں کی چھٹیاں دی جارہی ہیں، تمام تعلیمی اداروں میں فوری طورپر آن لائن کلاسز کا آغاز کیا جارہا ہے۔

اُن کا کہنا تھا کہ آئندہ 2 ماہ کےلیے کابینہ ارکان، وزرا، مشیران، معاون خصوصی تنخواہ نہیں لیں گے، ارکان پارلیمنٹ کی تنخواہوں میں سے 25 فیصد کٹوتی کی جارہی ہے۔

وزیراعظم نے یہ بھی کہا کہ 20 گریڈ اور اس سے اوپر کے افسران جن کی تنخواہ 3 لاکھ سے زیادہ ہو، ان کی 2 دن کی تنخواہ کی کٹوتی کرکے عوامی ریلیف کےلیے استعمال کی جائے گی۔

انہوں نے کہا کہ تمام سرکاری محکموں کے تنخواہوں کے علاوہ اخراجات میں 20 فیصد کمی کی جارہی ہے، سرکاری دفاتر میں گاڑیوں، فرنیچر، اے سی اور دیگر اشیا کی خریداری پر پابندی عائد کردی گئی ہے۔

شہباز شریف نے کہا کہ ملکی مفاد کے ضروری دوروں کے سوا وفاقی و صوبائی وزرا، گورنرز، مشیران اور معاون خصوصی، سرکاری افسران کے بیرون ملک دوروں پر بھی پابندی عائد کردی گئی ہے۔

اُن کا کہنا تھا کہ ٹیلی کانفرنسز اور آن لائن میٹنگز کو ترجیح دی جائے گی، سرکاری عشائیہ اور افطار پارٹیوں پر بھی مکمل پابندی کردی گئی ہے، سرکاری اخراجات میں کمی کے لیے سیمینار اور کانفرنسز ہوٹلوں کے بجائے سرکاری مقامات پر منعقد ہوں گے۔

وزیراعظم نے کہا کہ سرکاری اور نجی شعبے میں انتہائی ضروری سروسز کو چھوڑ کر 50 فیصد اسٹاف ورک فرام ہوم کام کرے گا۔