کینیڈین حکومت نے اپنے شہریوں کو فوری طور پر متحدہ عرب امارات چھوڑنے کی ہدایات جاری کردیں۔
کینیڈین حکام کا جاری ہدایت نامے میں کہنا ہے کہ عرب امارات میں موجود کینیڈین شہری حکومت کی خصوصی پروازوں کا انتظار نہ کریں۔
حکام نے کینیڈین عوام کو مشورہ دیا ہے کہ وہ زمینی راستے سے سعودی عرب یا سلطنت عمان ( مسقط ) پہنچیں۔
کینیڈین حکام نے کہا کہ کسی بھی وقت میزائل یا ڈرون حملے کا خدشہ ہے، سیکیورٹی صورتحال اچانک مزید بگڑ سکتی ہے، شہری فوجی تنصیبات اور حساس مقامات سے دور رہیں۔
امریکا نے مشرقِ وسطیٰ میں بڑھتی ہوئی جنگی کشیدگی کے پیشِ نظر اپنے شہریوں کو ایک درجن سے زائد ممالک فوری طور پر چھوڑنے کی ہدایت جاری کی ہے۔
امریکی محکمۂ خارجہ کے مطابق بحرین، مصر، ایران، عراق، مغربی کنارہ، غزہ، اردن، کویت، لبنان، عمان، قطر، سعودی عرب، شام، متحدہ عرب امارات اور یمن میں موجود امریکی شہریوں کو کمرشل پروازوں کے ذریعے جَلد از جَلد روانہ ہونے کا کہا گیا ہے۔
محکمۂ خارجہ کی اسسٹنٹ سیکریٹری برائے قونصلر امور مورا نامدار نے سوشل میڈیا پلیٹ فارم ایکس پر بیان میں کہا ہے کہ خطے میں سنگین سیکیورٹی خطرات کے باعث امریکی شہری فوری طور پر اپنے ملک کی جانب روانہ ہو جائیں۔
یہ انتباہ ایسے وقت میں سامنے آیا ہے جب امریکا اور اسرائیل کی جانب سے ایران پر حالیہ فضائی حملوں کے بعد خطے میں کشیدگی میں شدید اضافہ ہوا ہے۔
حملوں میں ایرانی قیادت کی کئی اہم شخصیات شہید ہوئیں جس کے جواب میں ایران نے بھی خطے میں جوابی کارروائیاں شروع کر رکھی ہیں۔
واضح رہے کہ امریکی صدر ڈونلڈ ٹرمپ نے اپنے بیان میں کہا تھا کہ یہ تنازع ابتدائی اندازوں کے مطابق 4 سے 5 ہفتے جاری رہ سکتا ہے تاہم اس کے طویل ہونے کا امکان بھی موجود ہے۔
Post your comments