Nawaipakistan.com

پاکستان پیپلز پارٹی کے چیئرمین بلاول بھٹو زرداری نے کہا ہے کہ دخترِ مشرق کی زندگی جرأت اور ہمدردی کا نادر امتزاج تھی اور ان کی عظیم قربانی خون سے لکھا عہد ہے کہ پاکستان میں جمہوریت کبھی سرنڈر نہیں کرے گی۔

بے نظیر بھٹو کی اٹھارہویں برسی پر جاری پیغام میں پی پی پی چیئرمین نے کہا کہ شہید محترمہ بینظیر بھٹو محض ایک رہنما نہیں تھیں بلکہ وہ جمہوریت کی نڈر آواز، مظلوموں کی امید اور آمریت، انتہاپسندی و عدم برداشت کے خلاف مزاحمت کی ناقابلِ تسخیر علامت تھیں۔

بلاول بھٹو کا کہنا تھا کہ وزیراعظم کی حیثیت سے شدید مشکلات کے باوجود بینظیر بھٹو نے عوام دوست پالیسیوں کو فروغ دیا، پاکستان کے دفاع کو مضبوط بنایا، قومی خودمختاری کا تحفظ کیا اور عالمی سطح پر ملک کی ترقی پسند اور باوقار شناخت بحال کی۔

محترمہ بینظیر بھٹو کو یاد کرتے ہوئے بلاول بھٹو نے کہا کہ اپنے والد اور بھائیوں کی شہادت اور برسوں کی اذیتوں کے باوجود شہید محترمہ بینظیر بھٹو جمہوریت کی جدوجہد میں آخری دم تک بلا خوف و خطر کھڑی رہیں، یہاں تک کہ جامِ شہادت نوش کیا۔

گورنر سندھ نے کہا کہ سعودی عرب کے دورے کے دوران بے نظیر بھٹو نے مسجد نبویﷺ میں کھڑے ہوکر مجھے اپنا بھائی بنایا تھا اور وہ آج بھی بہن کی حیثیت بےنظیر بھٹو کا احترام کرتے ہیں۔

گورنر سندھ کامران ٹیسوری نے بے نظیر بھٹو شہید کو یاد کرتے ہوئے بتایا کہ دبئی میں ایک پاکستانی بزنس مین نے مجھے بےنظیر بھٹو سے ملوایا تھا۔

اس ملاقات کے حوالے سے انہوں نے مزید کہا کہ میں نے بےنظیر بھٹو سے وعدہ کیا تھا کہ 15 روز میں پاسپورٹ دلواؤں گا اور 13 روز میں وعدہ نبھایا تھا۔

گورنر سندھ کا کہنا تھا کہ وطن واپسی پر سب سے پہلے بےنظیر بھٹو نے مجھےہی فون کال کی تھی۔

کامران ٹیسوری نے مزید کہا کہ اجمیر شریف اور لندن کے دورے میں بھی بی بی نے ساتھ رکھا تھا اور میری سالگرہ پر شہید بی بی نے قیمتی کفلنگ کا تحفہ دیا تھا۔