پاکستان کے سینئر اداکار فردوس جمال ایک بار پھر اپنے متنازع بیانات کے باعث خبروں میں آ گئے۔
حال ہیں میں ایک پوڈکاسٹ میں گفتگو کرتے ہوئے انہوں نے ماضی کے کئی نامور اداکاروں کے بارے میں منفی رائے کا اظہار کیا ہے، جس پر شوبز حلقوں میں بحث چھڑ گئی ہے۔
فردوس جمال نے لیجنڈ اداکار عابد علی کے بارے میں کہا ہے کہ وہ ایک مخصوص طرز کے اداکار تھے اور اداکاری کے لحاظ سے ٹھیک تھے، جبکہ انہوں نے طلعت حسین کو ایک دقیانوسی اداکار قرار دیتے ہوئے ان کے لیے سستے تھیٹریکلٹی کا لفظ استعمال کیا ہے۔
اسی طرح انہوں نے قوی خان کے بارے میں کہا ہے کہ وہ اپنی مخصوص مہارت کے مطابق اچھے اداکار تھے، جبکہ شفیع محمد کو ایک سادہ انسان قرار دیتے ہوئے کہا ہے کہ وہ حقیقت میں اداکار نہیں تھے بلکہ اسکرین پر خود کو ہی پیش کرتے تھے۔
مزید برآں فردوس جمال نے راحت کاظمی کے بارے میں بھی سخت رائے دیتے ہوئے انہیں محض شو پیس قرار دیا ہے اور کہا ہے کہ ان میں ٹیلنٹ کی کمی تھی۔
فردوس جمال کے ان بیانات پر سوشل میڈیا صارفین اور شوبز شخصیات کی جانب سے ملے جلے ردِعمل کا اظہار کیا جا رہا ہے، جہاں کچھ افراد ان کی رائے کو ذاتی نقطۂ نظر قرار دے رہے ہیں، جبکہ اکثریت اسے لیجنڈ فنکاروں کی توہین سمجھ رہی ہے۔
پاکستان شوبز انڈسٹری کی سینئر اداکارہ بشریٰ انصاری نے ساتھی اداکار فردوس جمال کے متنازع بیانات پر سخت ردِعمل دیتے ہوئے کہا ہے کہ کسی کو بھی دوسرے فنکاروں کی تضحیک کا حق حاصل نہیں۔
بشریٰ انصاری جو چار دہائیوں سے زائد عرصے پر محیط کیریئر رکھتی ہیں، انہوں نے ایک وی لاگ میں فردوس جمال کے حالیہ بیانات پر افسوس کا اظہار کیا ہے۔
بشریٰ انصاری نے اپنے ردِعمل میں کہا ہے کہ میں فردوس جمال کی بہت عزت کرتی ہوں لیکن کسی کو بھی دوسرے فنکاروں کو برا بھلا کہنے کا حق نہیں۔
ان کا کہنا ہے کہ شوبز انڈسٹری میں شاذ و نادر ہی کوئی اداکار کمزور ہوتا ہے، اس لیے ایسے بیانات دینے کی ضرورت نہیں۔
اداکارہ نے کہا کہ فردوس جمال کو اپنی سوچ اور ذہنی کیفیت کا خیال رکھنا چاہیے کیونکہ منفی رویہ ناصرف دوسروں بلکہ ان کے اپنے بچوں کو بھی متاثر کر رہا ہے۔
یاد رہے کہ فردوس جمال نے ایک پوڈکاسٹ میں مرحوم اداکاروں طلعت حسین، شفیع محمد، راحت کاظمی اور خیام سرحدی کے حوالے سے منفی تبصرے کیے تھے، جبکہ عابد علی مرحوم کی اداکاری پر بھی تنقید کی تھی اور کہا تھا کہ ان میں سے کوئی اداکاری نہیں جانتا تھا۔
ان بیانات پر سوشل میڈیا صارفین اور شوبز شخصیات کی جانب سے شدید تنقید کی گئی، خاص طور پر اس لیے کہ جن فنکاروں پر تنقید کی گئی وہ اس دنیا میں موجود نہیں۔
Post your comments