پاک فوج نے بہاول نگر کے واقعے کی مشترکہ تحقیقات کا اعلان کردیا۔
پاک فوج کے شعبہ تعلقات عامہ آئی ایس پی آر نے اپنے جاری بیان میں کہا کہ بہاول نگر میں پیش آئے افسوس ناک واقعے کی تحقیقات اور واقعے کے ذمے داروں کا تعین کرنے کےلیے سیکیورٹی اور پولیس اہلکاروں پر مشتمل مشترکہ انکوائری کی جائے گی۔آئی ایس پی آر کے مطابق تحقیقات کے بعد اختیارات کا ناجائز استعمال کرنے والوں کے خلاف کارروائی ہوگی۔آئی ایس پی آر کا کہنا ہے کہ حال ہی میں بہاول نگر میں ایک افسوس ناک واقعہ پیش آیا، پولیس اور عسکری حکام کے تعاون سے مسئلہ بروقت حل کرلیا گیا۔آئی ایس پی آر کے مطابق بعض عناصر نے تقسیم پیدا کرنے کےلیے سوشل میڈیا پر پروپیگنڈا شروع کردیا۔آئی ایس پی آر کے مطابق مذموم مقاصد کے لیے ریاستی اداروں اور سرکاری محکموں کے درمیان تقسیم پیدا کرنے کی کوشش کی گئی۔
حکومت پنجاب نے بہاول نگر واقعے کی تحقیقات کےلیے جوائنٹ انکوائری ٹیم (جے آئی ٹی) تشکیل دے دی۔
ترجمان پنجاب حکومت کے مطابق بہاول نگر واقعہ افسوس ناک ہے، جس کی تحقیقات کے لیے محکمہ داخلہ اور سیکیورٹی اداروں پر مشتمل جوائنٹ انکوائری ٹیم تشکیل دی گئی ہے۔صوبائی حکومت کے ترجمان کے مطابق مفاد پرستوں کو ریاستی اداروں کے خلاف پروپیگنڈا کی اجازت نہیں دی جائے گی۔
انسپکٹر جنرل (آئی جی) پنجاب پولیس ڈاکٹر عثمان انور نے کہا ہے کہ بہاول نگر واقعہ سے متعلق سوشل میڈیا پر اداروں میں ٹکراؤ کا تاثر دینے کی کوشش کی گئی، ملک دشمن کالعدم تنظیم اداروں میں ٹکراؤ کا تاثر پیدا کرنے کی کوشش کر رہی ہے۔
بہاول نگر واقعہ کے حوالے سے اپنے بیان میں ڈاکٹر عثمان کا کہنا تھا کہ پولیس کا مورال وہ بنیاد ہے جس سے ہم دہشت گردوں اور ڈاکوؤں سے لڑتے ہیں۔انہوں نے کہا کہ دونوں اداروں نے مشترکہ طور پر اس کا فوری ایکشن لیا، آر پی او بہاولپور اور آرمی کی مقامی کمانڈ نے علاقے کا دورہ کیا۔آئی جی پنجاب پولیس کا کہنا تھا کہ ملک دشمن کالعدم تنظیم اداروں میں ٹکراؤ کا تاثر پیدا کرنے کی کوشش کر رہی ہے۔ مایوسی پھیلانے کےلیے پرانی ویڈیوز کو بھی سیاق و سباق سے ہٹ کر پیش کیا گیا۔ڈاکٹر عثمان کا کہنا تھا کہ اسپیشل انیشئیٹو پولیس اسٹیشنز کے ایس او پی فالو نہ کرنے کے باعث واقعہ پیش آیا۔ دونوں اداروں نے مل کر معاملے کو خوش اسلوبی سے حل کیا۔آئی جی پنجاب پولیس نے کہا کہ آئی ایس پی آر کے مطابق جوائنٹ انوسٹی گیشن انکوائری قائم کردی گئی ہے، انوسٹی گیشن انکوائری کے دوران قانون کے تقاضوں کو پورا کیا جائے گا۔انکا کہنا تھا کہ پنجاب حکومت نے بھی واقعہ کے ذمہ داران کے تعین کےلیے انکوائری کمیٹی بنادی۔ انکوائری کمیٹی میں مسلح افواج، پنجاب پولیس اور سول حکام شامل ہیں۔ڈاکٹر عثمان انور کے مطابق پولیس اور فورس کے درمیان فیملی جیسے رشتے کو توڑنے کی ناکام کوشش کی گئی، فورس پر لازم ہے سوشل میڈیا ٹرولنگ یا غیر ضروری تنقید پر کان نہ دھرے۔آئی جی پنجاب پولیس کا کہنا تھا کہ پولیس نے میانوالی، ڈی جی خان، جڑانوالہ ہر جگہ وطن دشمنوں کے عزائم ناکام بنائے۔ ملک و قوم کی خدمت اور حفاظت پولیس کا نصب العین ہے۔
Post your comments