سیکریٹری جنرل اقوام متحدہ انتونیو گوتریس نے کہا ہے کہ وہ ریاض کے شاہ خالد انٹرنیشنل ایئرپورٹ پر حوثی حملے کی سخت مذمت کرتے ہیں۔
غیر ملکی میڈیا کے مطابق انہوں نے کہا ہے سعودی عرب پرحوثی حملے فوری بند کیے جائیں۔
انتونیو گوتریس کا کہنا ہے کہ ریاض ایئرپورٹ پر حوثی حملے میں 12 افراد ہلاک اور سیکڑوں شہری زخمی ہوئے۔
انہوں نے مزید کہا ہے کہ شہریوں اور شہری تنصیبات کو نشانہ بنانا بین الاقوامی قانون کی خلاف ورزی ہے۔
سیکریٹری جنرل اقوام متحدہ نے یہ بھی کہا ہے کہ وہ ریاض ایئرپورٹ پر حملے میں انسانی جانوں کے نقصان پر گہرے صدمے میں ہیں۔
پاکستان، سعودی عرب، مصر اور ترکیے پر مشتمل آر فور گروپ نے شاہ خالد ایئرپورٹ ریاض پر حملوں کی مذمت کردی۔
ترجمان دفتر خارجہ کے مطابق آر فور کے مشترکہ اعلامیے میں شاہ خالد ایئر پورٹ ریاض پر حملوں کو سعودی عرب کی خود مختاری اور علاقائی سالمیت کی خلاف ورزی قرار دیا ہے۔
اعلامیے کے مطابق حوثی حملوں میں شہری انفرااسٹرکچر اور تنصیبات کو نقصان پہنچا، حملے سعودی عرب کی سلامتی، استحکام اور شہریوں کے تحفظ کے لیے خطرہ ہیں۔
آر فور گروپ نے مکمل یکجہتی اور حمایت کا اعادہ کیا اور سعودی عرب کے تمام جائز اقدامات کی مکمل حمایت کا اعلان کیا۔
اعلامیے کے مطابق سعودی عرب کو اپنی خودمختاری، علاقائی سالمیت کا حق حاصل ہے، حوثی ملیشیا حملوں اور علاقائی و عالمی امن و سلامتی کو لاحق خطرات کی مکمل ذمہ دار ہے۔
آر فور گروپ نے سعودی عرب پر حملے فوری اور غیر مشروط طور پر بند کرنے کا مطالبہ کردیا۔
