سعودی عرب، شام کے ورلڈ بینک کے قرضے ادا کرنے کا ارادہ رکھتا ہے۔
غیر ملکی خبر ایجنسی نے ذرائع کے حوالے سے خبر دی ہے کہ سعودی عرب کی جانب سے یہ ادائیگی شام کی تعمیرِ نو کےلیے بین الاقوامی گرانٹس کے اجراء کی راہ ہموار کر سکتی ہے۔ ایسا ہوا تو یہ شام کےلیے سعودی عرب کی جانب سے مالی امداد کا پہلا واقعہ ہوگا۔ شام کے ذمہ ورلڈ بینک کے تقریباً 15 ملین ڈالرز کے بقایاجات ہیں، جن کی ادائیگی ضروری ہے تاکہ ورلڈ بینک شام کےلیے گرانٹس منظور کر سکے اور دیگر معاونت فراہم کر سکے۔ میڈیا رپورٹ کے مطابق یہ اس بات کی علامت بھی ہو سکتی ہے کہ خلیجی ممالک کی شام کےلیے حمایت بالآخر عملی شکل اختیار کرنے لگی ہے۔ گزشتہ ماہ قطر نے اُردن کے راستے شام کو گیس فراہم کرنے کے منصوبے کا اعلان کیا تھا اور واشنگٹن نے اِس منصوبے کی منظوری دی تھی۔ خبر ایجنسی کے مطابق سعودی حکومت کے میڈیا دفتر، ورلڈ بینک کے ترجمان اور شامی حکومتی اہلکار نے فوری طور پر اس معاملے پر تبصرہ کرنے کی درخواست کا جواب نہیں دیا۔
Post your comments