سینیٹ سے 27ویں آئينی ترمیم مزید نئی ترامیم کے ساتھ منظور ہو گئی۔
وفاقی کابینہ کا اجلاس آج دوپہر ہوگا۔ کابینہ آئینی ترامیم کی روشنی میں قوانین میں تبدیلیوں کی منظوری دے گی۔قومی اسمبلی نے گزشتہ روز 27ویں ترمیم میں 8 نئی ترامیم شامل کی ہیں۔
حکومت نے تجاویز پر آرٹیکل 6 کی کلاز 2 میں تبدیلی کی ہے۔ کلاز 2 کے تحت سنگین غداری کا عمل کسی بھی عدالت کے ذریعے جائز قرار نہیں دیا جا سکے گا، آرٹیکل 6 کی کلاز 2 میں ہائی کورٹ اور سپریم کورٹ کے ساتھ آئینی عدالت کے لفظ کا اضافہ کیا گيا ہے، موجودہ چیف جسٹس کو عہدے کی مدت پوری ہونے تک چیف جسٹس پاکستان کہا جائے گا، اس کے بعد چیف جسٹس سپریم کورٹ اور چیف جسٹس وفاقی آئینی عدالت میں سے سینئر ترین جج چیف جسٹس پاکستان ہوگا۔
سینیٹ کی کارروائی
سینیٹ کی کارروائی کے دوران جے یو آئی ایف نے 27ویں ترمیم کی مخالفت میں ووٹ دیا جبکہ اپوزیشن نے ترمیم کے خلاف نعرے بازی کی۔سینیٹ میں 27ویں آئینی ترمیم کی مزید ترامیم کے ساتھ شِق وار منظوری پر ایوان میں گھنٹیاں بجائیں گئیں۔
قومی اسمبلی کی کارروائی کا احوال
واضح رہے کہ گزشتہ روز 27ویں آئينی ترمیم قومی اسمبلی میں دو تہائی اکثریت سے منظور کی گئی تھی جبکہ اپوزيشن نے بِل کی کاپیاں پھاڑ کر اسپیکر ڈائس کے سامنے احتجاج کرتے ہوئے کارروائی کا بائيکاٹ کیا تھا۔ترمیم کی منظوری کے لیے حکومت کے پاس درکار 224 سے زیادہ 234 ارکان موجود تھے۔جے یو آئی (ف) نے قومی اجلاس کے دوران 27ویں ترمیم کی مخالفت میں ووٹ دیا تھا۔ترمیم کی منظوری کےلیے نواز شریف بھی ایوان میں پہنچے تھے، بلاول بھٹو نواز شریف سے اِن کی سیٹ پر جا کر ملے، نواز شریف نے آصفہ بھٹو زرداری کے سر پر دستِ شفقت رکھا۔پیپلز پارٹی کے خورشید شاہ بھی وہیل چیئر پر ایوان میں ووٹ کاسٹ کرنے پہنچے تھے۔
Post your comments