وفاق اور خیبر پختونخوا حکومت کے درمیان بجلی لوڈشیڈنگ کا تنازع مزید شدت اختیار کرگیا‘وزیراعلیٰ گنڈاپورکی نیشنل گرڈ کو بجلی بندکرنے کی پھردھمکی ‘ڈی آئی خان میں ہجوم کے ہمراہ گرڈاسٹیشن میں داخل ہوکر بجلی بحال کردی اور کہا کہ 12 گھنٹے سے زائد لوڈ شیڈنگ نہیں ہوگی‘ انہوں نے شہبازشریف کو مخاطب کرتے ہوئے کہا کہ مجھے پہلے صوبے کا پیسہ چاہیے ورنہ میں آئی ایم ایف کو بتادوں گا کہ حکومت ہمارے نام پر پیسے لیکر اپنی جیبیں بھرتی ہے ‘مجبور نہ کریں کہ آپ کی حکومت کو دھکا دے کر نکالیں‘پھر لانے والے بھی آپ کو نہیں بچا سکیں گے‘ دوسری جانب وفاقی وزیرداخلہ محسن نقوی اور وزیر اعلیٰ گنڈاپور میں رابطہ ہوا ہے۔ علی امین گنڈاپور نے اپنے تحفظات سے وزیرداخلہ محسن نقوی کو آگاہ کیا ۔ دونوں رہنماؤں نےکے پی میں12 گھنٹے لوڈشیڈنگ پر اگلے2 روز میں مشاورت اور مذاکرات پر اتفاق کیا ۔ وزیرداخلہ نے کہا کہ افہام و تفہیم سے باہمی غلط فہمیاں دور کی جائیں گی۔وزیراعلیٰ نے وزیرداخلہ کو گرڈ اسٹیشنز کی حفاظت اور تحفظ کی یقین دہانی کرائی۔ اس موقع پر محسن نقوی کا کہنا تھاکہ پوری کوشش ہے کہ خیبرپختونخوا میں لوڈشیڈنگ کا مسئلہ جلد حل ہو اور تمام وفاقی تنصیبات کی حفاظت ہماری ذمہ داری ہے۔ قبل ازیں ایم پی اے فضل الہی نے ایک بار پھر پیسکو گرڈ میں گھس کرزبردستی 4 فیڈز چالو کرائے ‘ فضل الٰہی نے اس سے پہلے بھی پشاور کے رحمان بابا گرڈ اسٹیشن میں داخل ہوکرزبردستی اپنے علاقے کی بجلی بحال کر دی تھی۔ پولیس نے رحمان بابا گرڈ اسٹیشن سے زبردستی بجلی بحال کرانے کی ایف آئی آر تو درج کرلی تاہم مقدمے میں ایم پی اے فضل الٰہی کو نامزد نہیں کیا گیا۔
Post your comments