فلسطینی نژاد امریکی سُپر ماڈل بیلا حدید کا شمار ان چند مشہور شخصیات میں ہوتا ہے جو مظلوم فلسطینیوں کے لیے بلا جھجک آواز اٹھاتی ہیں۔ بیلا حدید سوشل میڈیا کے ذریعے مسلسل اپنی ثقافت کے بارے میں شعور اجاگر کرتی نظر آ رہی ہیں۔حال ہی میں اُنہوں نے کانز فلم فیسٹیول میں فلسطینی مزاحمت کی علامت ’کوفیہ‘ کے ڈیزائن والا لباس پہن کر شرکت کی۔جس کے بعد اب اُنہوں نے فوٹو اینڈ ویڈیو شیئرنگ ایپ انسٹاگرام پر ’کوفیہ‘ کی اہمیت اور اس کے ڈیزائن کا مطلب بھی بتایا ہے۔اُنہوں نے اپنی پوسٹ میں لکھا ہے کہ فلسطین میرے دل، دماغ اور خون میں ہمیشہ موجود ہے یہاں تک کہ غزہ میں جاری وحشیانہ مظالم کے باوجود بھی اپنے کام کے ذریعے اپنی ثقافت کو اُجاگر کرنا مجھے ایک قابلِ فخر فلسطینی بناتا ہے۔بیلا حدید نے لکھا کہ میں چاہتی ہوں کہ ہم جہاں بھی جائیں دنیا ہم میں فلسطین کو دیکھے۔اُنہوں نے لکھا کہ میں ایسے ڈیزائنرز کو اجاگر کرنا چاہتی ہوں جنہوں نے فلسطین کے مسئلے کی طرف دنیا کی توجہ دلائی۔بیلا حدید نے بتایا کہ میرا یہ لباس حشیدار مرتضیٰ نے بنایا ہے جو تاریخ، محنت، ہمت اور سب سے اہم چیز فلسطینی کڑھائی کے فن کی نمائندگی کرنے کا ایک خوبصورت طریقہ ہے۔اُنہوں نے کوفیہ کے ڈیزائن کے بارے میں لکھا کہ فلسطینی کوفیہ کا ڈیزائن مختلف موضوعات جیسے کہ زیتون کے پتے، طاقت، ہمت اور استقامت کی علامت ہے۔بیلا حدید نے مزید لکھا کہ کوفیہ کے ڈیزائن کا بڑا حصہ مچھلی کے جال جیسا ہے جو فلسطینی ماہی گیروں اور سمندر کے درمیان تعلق کو بیان کرتا ہے اور یہ فضل و برکت کی علامت بھی ہے یہی نہیں بلکہ بہت سارے فلسطینیوں کے لیے سمندر کا مطلب آزادی بھی ہے۔اُنہوں نے مزید لکھا کہ ابھی ویسٹ بینک میں رہنے والے فلسطینیوں کو اسرائیل کی جانب سے عائد پابندیوں کی وجہ سے سمندر تک رسائی حاصل نہیں ہے۔بیلا حدید نے لکھا کہ کوفیہ کے ڈیزائن کا سمندر کی لہروں اور زیتون کے پتوں سے مشابہت رکھتا حصّہ ہماری برادریوں کی طاقت اور ہمت کو ظاہر کرتا ہے جو 73 سال سے اسرائیلی فوج کے قبضے میں رہنے کے باوجود بھی ثابت قدم رہیں۔اُنہوں نے مزید لکھا کہ ڈیزائن میں موجود موٹی لکیریں فلسطین سے گزرنے والے تجارتی راستوں کی نمائندگی کرتی ہیں جنہوں نے فلسطین کی تاریخ اور بھرپور ثقافت کو تراشنے میں اہم کردار ادا کیا۔
Post your comments