گلگت بلتستان کے ضلع دیامر میں آج صبح مسافر بس سیکڑوں فٹ گہری کھائی میں جاگری، افسوسناک حادثے میں خواتین سمیت 21 افراد جاں بحق اور 20 زخمی ہوگئے۔ 10 شدید زخمیوں کو گلگت کے اسپتال منتقل کیا گیا، ریسکیو آپریشن میں آرمی کے ہیلی کاپٹرز نے بھی حصہ لیا۔راولپنڈی سے ہنزہ جانے والی مسافر بس شاہراہ قراقرم یشوکل داس کے مقام پر بے قابو ہو کرسیکڑوں فٹ گہری کھائی میں جا گری،حادثہ اتنا شدید تھا کہ بس کی چھت دور جاگری۔حادثہ چلاس شہر سے 20 کلو میٹر دور پیش آیا۔ جائے حادثہ پر ریسکیو آپریشن مکمل کرلیا گیا ہے۔ڈپٹی کمشنر دیامر فیاض احمد خان کے مطابق آپریشن میں آرمی کے ہیلی کاپٹرز نے بھی حصہ لیا۔ لاشوں اور زخمیوں کو ریجنل ہیڈکوارٹر اسپتال چلاس متنقل کیا گیا، اسپتال میں ایمرجنسی نافذ کردی گئی ہے۔وزیر اعلیٰ گلگت بلتستان اور وزیر صحت نے واقعے پر افسوس کا اظہار کرتے ہوئے زخمیوں کے علاج معالجے کے لئے تمام وسائل بروئے کار لانے کے احکامات دیے ہیں۔
Post your comments